Iż-żagħżugħ ta’ 18-il sena Kobbie Mainoo kien imsejjaħ għall-ewwel darba mill-Ingilterra, l-aħħar pass tiegħu fi staġun innovattiv li għadu jista’ jispiċċa b’post fl-iskwadra ta’ pajjiżu għall-Kampjonat Ewropew fil-Ġermanja matul Ġunju u Lulju.
Mainoo kien intgħażel għall-Ingilterra ta’ taħt il-21 sena iżda żdied mal-grupp tal-kbar ta’ Gareth Southgate qabel il-logħob kontra l-Brażil is-Sibt u l-Belġju nhar it-Tlieta, it-tnejn f’Wembley Stadium.
Mainoo, li qabel kien jirrappreżenta lill-Ingilterra ta’ taħt is-17 u d-19-il sena, s’issa kellu 20 dehra għal United dan l-istaġun. Il-midfielder ingħaqad mal-United ta’ disa’ snin u ddebutta kmieni fl-2023 f’logħba tal-League Cup kontra Charlton.
Mainoo twieled fi Stockport Greater Manchester.
Mainoo huwa eliġibbli wkoll għall-Ghana u l-FA tal-Ghana preċedentement esprimiet interess li ssejjaħlu.
Minkejja li l-Ingilterra attwalment hi mimlija bi plejers ta’ talent, il-pożizzjoni ta’ midfeielder ċentrali hi forsi l-punt debboli tal-Ingilterra.
F’din il-pożizzjoni Gareth Southgate ħafna drabi dar għas-servizzi ta’ Kalvin Phillips u Jordan Henderson, u l-iktar għal Declan Rice li huwa ċertezza għall-Ingilterra. Iżda Mainoo għad jista’ jkun is-sorpriża ta’ Southgate għall-Euro 2024, fejn jilgħab wara l-midfielder attakkant Jude Bellingham.
Hu lagħab ħames logħbiet mat-tim ta’ taħt is-17-il sena u sitt darbiet mat-tim ta’ taħt id-19-il sena.
