Ħal Għaxaq, Ħal Għargħur u l-parroċċa tal-Katidral f’Għawdex fakkru l-passjoni ta’ Kristu fil-purċissjonijiet tradizzjonali – purċissjonijiet li kull sena jiġbdu lejhom eluf ta’ devoti.
Matul il-jum, il-Kap tal-Partit Nazzjonalista Bernard Grech żar numru ta’ wirjiet tal-Ġimgħa Mqaddsa fosthom dawk fil-Każin tal-Ġilju u l-Każin ta’ Santa Marija fl-Imqabba.
Huwa tkellem ma’ dawk li jorganizzaw il-wirjiet tradizzjonali, u rringrazzjahom tax-xogħol siewi tagħhom, dilettanti li b’passjoni kbira sena wara l-oħra jtellgħu dawn il-wirjiet u dejjem jaraw kif se jżidu u jtejbu x-xogħol tagħhom fuq dawk tas-sena ta’ qabel. Xogħol li jieħu ħafna ħin kif ukoll paċenzja u sagrifiċċji.
Huma qassmu wkoll ix-xewqa li x-xogħol tagħhom jibqa’ jiġi apprezzat mill-Maltin kollha, li minn naħa tagħhom jistgħu jagħmlu dan billi jżuru l-wirjiet fil-jiem li ġejjien.
Għal dawn iż-żjarat, flimkien mal-Kap tal-Partit Nazzjonalista, ingħaqdu wkoll id-deputati David Agius, Toni Bezzina u Stanley Zammit.
Il-Kap tal-Partit Nazzjonalista attenda wkoll għar-reċta tal-passjoni ta’ Ġesu Kristu li ttellgħet fl-Imqabba fil-Każin ta’ Santa Marija.
Wara d-drama tal-passjoni, Bernard Grech kellu wkoll l-opportunità li jkellem lil dawk preżenti fil-Każin li qasmu miegħu l-passjoni li għandhom għal dan iż-żmien tas-sena.
Aktar tard matul il-Jum Bernard Grech żar ukoll il-Pruċissjoni tal-Għargħur. Hu kien akkumpanjat mill-mara tiegħu AnneMarie Grech, il-Membru Parlamentari Ewropej David Casa u d-deputat tal-Partit Nazzjonalista Beppe Fenech Adami.
