Il-jott Geisha ta’ Stefan Debattista, kisbet ir-rebħa ġenerali fir-Royal Malta Yacht Club Gozo Weekend, b’punt differenza mill-jott Jubatus ta’ Sean Borg, li min-naħa tiegħu kellu distakk ta’ punt fuq il-jott ta’ John Cachia West, Ottovolante. L-ewwel tellieqa fir-RMYC Gozo Weekend kienet waħda lejn Għawdex, b’Ottovolante jikseb ir-rebħa.
It-tieni prova kienet tinkludi tiġrija madwar Għawdex, mirbuħa minn Geisha. Fit-tielet tellieqa l-azzjoni kompliet rotta madwar Filfla, li ntrebħet minn Miame Too ta’ Ralph Landwehr. L-aħħar tellieqa rat il-flotta tirritorna lejn Marsamxett, fejn intrebħet minn Jubatus.
Fil-Klassi tal-IRC Cruisers, Pippus ta’ David Anastasi kiseb l-ewwel post, b’distakk ta’ punt fuq Inspiration ta’ Godwin Zammit, u Janissah ta’ Mario Debono fit-tielet post. Il-Klassi tal-RMYC Cruisers intrebħet minn Gozo Dream, ta’ Noel Grech, li rebħet tnejn mill-erba’ tiġrijiet. Kira ta’ Gino Cutajar rebħet l-ewwel tiġrija u Cru ta’ Peter Delia tirbaħ it-tielet tiġrija.
Il-klassi RMYC Cruising hija mfassla għal dgħajjes li ma jkunux iffukati fuq tlielaq kompetittivi iżda xorta jridu jgawdu l-esperjenza ma’ dilettanti oħra tal-ibburdjar. Il-Club issa qed iħejji għall-International Yacht Paints Marzamemi Regatta li se ssir bejn it-3 u l-5 ta’ Mejju, u se tkun l-ewwel tiġrija offshore tal-Club għall-istaġun 2024.
