Raġel li ħarab waqt li kien qed jiffaċċja l-prosekuzzjoni għal serq bl-armi u li nġieb lura Malta bis-saħħa ta’ Mandat ta’ Arrest Ewropew wara li erba’ xhur ilu kien arrestat fil-fruntiera bejn il-Kroazja u s-Serbja, tressaq il-Qorti l-Erbgħa wara nofsinhar.
Vladimir Pajic, iċ-ċittadin Serb ta’ 28 sena, ġie arrestat mill-Pulizija Kroata f’Ottubru tas-sena l-oħra waqt li kien qed jipprova jaqsam il-fruntiera fis-Serbja. Huwa kien arrestat bis-saħħa ta’ Mandat ta’ Arrest Ewropew maħruġ mill-awtoritajiet Maltin li talbu għar-ritorn tar-raġel biex jiffaċċja proċeduri kriminali li allegatament jorbtuh mar-reat vjolenti.
Pajic kien wieħed mit-tliet suspettati akkużati f’Novembru 2022 wara ‘hold-up’ armat f’appartament fin-Naxxar. Żewġ aggressuri, aktar tard identifikati bħala Pajic u Victor Markovic, żammew lil Olandiż u Franċiża b’pistola u sikkina, u ħarbu bi flus kontanti u affarijiet oħra li jiswew aktar minn €2,000.
Il-mara, Milica Kurcubic, ġiet mixlija flimkien maż-żewġt irġiel wara li rriżulta li hija allegatament kompliċi, li ffaċilitat ir-reat. It-tlieta wieġbu mhux ħatja. Waqt li komplew il-proċeduri kriminali, Pajic kien ħarab mill-gżira.
Wara l-arrest tiegħu fil-Kroazja, huwa għadda minn proċeduri ta’ estradizzjoni, iżda ma tax il-kunsens tiegħu għall-estradizzjoni u aktar tard ippreżenta wkoll appell. Il-Qorti fil-Kroazja laqgħet it-talba tal-awtoritajiet Maltin u wittiet it-triq għar-ritorn tar-raġel lejn Malta.
Dik is-sentenza finali mogħtija minn Qorti Kroata, ġiet ippreżentata fil-Qorti l-Erbgħa meta Pajic tressaq il-Qorti, li qed jiffaċċja l-akkuża solitarja li kiser il-kundizzjonijiet tal-pleġġ. L-avukat difensur Shazoo Ghaznavi qajjem kwistjoni legali dwar jekk dik is-sentenza, ippreżentata lill-Qorti fil-verżjoni oriġinali Kroata tagħha, kinitx estiża għall-allegat reat ta’ ksur tal-libertà proviżorja jew kinitx limitata għall-akkużi li jorbtu lil Pajic mas-serqa tan-Naxxar.
Fid-dawl ta’ dawn is-sottomissjonijiet u peress li ż-żewġ partijiet qablu li l-proċeduri kienu jeħtieġu kjarifika, din is-sentenza barranija kellha tiġi tradotta. Il-Qorti, ippreseduta mill-Maġistrat Claire Stafrace Zammit, ħatret espert biex jittraduċi d-dokument.
Intant, l-akkużat kellu jibqa’ taħt arrest preventiv sakemm il-kwistjoni tiġi solvuta.
L-avukati Shazoo Ghaznavi, Charlon Gouder u Jessica Formosa kienu l-avukati difensuri.
