Rebħa drammatika għal Newcastle fuq West Ham f’St’James’s Park bl-iskor ta’ 4-3. Kienu Newcastle li fetħu l-iskor fis-6 minuta meta mill-ħdax-il metru kien Alexander Isak li xeħet fix-xibka. Fil-21 minuta West Ham kisbu d-draw minn Michael Antonio, qabel fil-ħin mogħti żejjed tal-ewwel taqsima, kien Mohammed Kudus li poġġa lit-tim ta’ David Moyes fil-vantaġġ. Mal-ftuħ tat-tieni taqsima West Ham kabbru l-vantaġġ b’gowl ta’ Jarrod Bowen. Ir-rimonata ta’ Newcastle bdiet fis-77 minuta meta għal darb’oħra reġa’ kien Isak li mill-ħdax-il metru ma’ żbaljax għal 3-2. Sitt minuti wara kien Harvey Barnes li kiseb il-gowl tad-draw qabel fid-90 minuta kien l-istess Barnes li aċċerta minn rebħa ta’ Newcastle fi tmiem drammatiku, b’Anthony Gordon jitkeċċa għal Newcastle.
Rebħa ta’ 2-1 għal Tottenham fuq Luton fit-Tottenham Hotspur Stadium. Kienu Luton li marru fil-vantaġġ wara 3 minuti meta Ross Barkley għadda lejn Tahith Chong li kkonkluda fix-xibka. Tottenham irreaġixxew fil-51 minuta minn awto-gowl ta’ Issa Kabore, biex fis-86 minuta kien l-attakkant prolifiku Heung Min Son li ta’ rebħa importanti lit-tim ta’ Postecoglou.
Draw drammatiku wkoll bejn Brentford u Manchester United meta fis-96 minuta kien Mason Mount li fir-ritorn tiegħu xeħet fix-xibka, qabel minuta wara kien Kristoffer Ajer li kiseb id-draw għal 1-1.
PREMIER LEAGUE
Illum: Newcastle v West Ham 4-3, B’Mouth v Everton 2-1, Chelsea v Burnley 2-2, Nott’ Forest v C’Palace 1-1, Sheff. Utd v Fulham 3-3, Tottenham v Luton T. 2-1, Aston Villa v Wolves 2-0, Brentford v Man Utd. 1-1
Għada: Liverpool v Brigthon 3.00pm, Man City v Arsenal 5.30pm
