It-tim imexxi minn Xabi Alonso, Bayer Leverkusen jinsabu dejjem eqreb li jirbħu l-Bundesliga għal dan l-istaġun meta għal darb’oħra skorjaw darbtejn fl-aħħar ħinijiet tal-partita biex għelbu lil Hoffenheim 2-1. Hoffenheim fetħu l-iskor fit-33 minuta permezz ta’ Maximillian Beier. Bayer Leverkusen kellhom jistennew sat-88 minuta biex iġibu l-iskor indaqs permezz ta’ Robert Andrich, qabel ma fil-ħin mogħti żejjed, kien Peter Schick li skorja l-gowl tar-rebħa.
Din kienet d-39 partita mingħajr telfa għal Bayer Leverkusen hekk kif issa jinsabu 13-il punt vantaġġ fuq l-eqreb rivali tagħhom Bayern Munich li minn naħa tagħhom tilfu d-Der Klassiker kontra Borussia Dortmund. Intant dan ir-riżultat ikompli mal-ġimgħa pożittiva li kellhom Bayer Leverkusen hekk kif il-kowċ Xabi Alonso kkonferma li se jkun qed jibqa’ mal-klabb għal staġun ieħor.
Intant fid-Der Klassiker, Borussia Dortmund għelbu lir-rivali tagħhom Bayern Munich 2-0, bl-ewwel rebħa f’din il-partita sa mill-2019. Il-gowls ta’ Dortmund kienu skorjat minn Karim Adeyemi u Julian Ryerson. Fi tmiem il-partita, il-kowċ ta’ Bayern Munich, Thomas Tuchel stqarr li l-kampjonat huwa lest filwaqt li feraħ lil Bayer Leverkusen.
