F’jum fejn it-tliet timijiet li jinsabu fl-ewwel tliet postijiet tal-Premier League kienu nvoluti, kienu Liverpool li telgħu fl-ewwel post tal-Premier League meta f’Anfield għelbu lil Brighton 2-1. F’partita oħra, Manchester City u Arsenal temmew fi draw ta’ 0-0
It-tim ta’ Jurgen Klopp kellu jirkupra minn gowl żvantaġġ biex għeleb lil Brighton ta’ Roberto De Zerbi 2-1. Kien Danny Welbeck li wara biss tliet minuti poġġa lil Brighton kontra kull mistenni fil-vantaġġ. Liverpool wettqu reazzjoni u ġabu l-iskor indaqs fis-27 minuta, meta f’tentattiv li jtajjar il-ballun, Joel Veltman lagħab il-ballun lura fejn sab lil Luiz Diaz li minn taħt Bart Verbruggen ma żbaljax u spara fis-saqaf tax-xibka għal 1-1. Liverpool irnexxielhom idawru l-partita fil-65 minuta meta kien pass mill-isbaħ ta’ Alexis Mc Allister li sab lil Mohamed Salah żmarkat fil-kaxxa li għamilhom 2-1. Brighton pruvaw iġibu l-iskor indaqs lejn it-tmiem iżda naqsu milli jagħmlu dan b’Liverpool jiddefendu b’mod tajjeb.
Fil-partita tal-ġurnata, fl-Etihad Stadium, draw ta’ mingħajr gowls bejn Manchester City u Arsenal, fejn b’dan ir-riżultat kienu Liverpool li approfittaw hekk kif baqgħu fl-ewwel post b’67 punt segwiti minn Arsenal b’65 punt u Manchester City b’64 punt. Kienet partita bilanċjata ferm, fejn minkejja li t-tim ta’ Pep Guardiola kellu l-maġġoranza tal-pusses, it-tim ta’ Mikel Arteta għaraf jagħlaq l-ispazzji b’mod tajjeb u jillimita lill-plejers ta’ Manchester City. Kienu City li kellhom l-ewwel azzjoni denja ta’ nota fl-ewwel taqsima meta minn corner ta’ Kevin De Bruyne, Nathan Ake għola fuq kulħadd, iżda l-kuntatt tiegħu mal-ballun kien wieħed minimu, bil-ballun jispiċċa f’idejn David Raya.
Mal-ħin Arsenal komplew jikbru fil-partita u ftit qabel il-mistrieħ setgħu marru fil-vantaġġ iżda l-konklużjoni ta’ Gabriel Jesus għaddiet ftit barra. Fit-tieni taqsima, l-andament baqa’ l-istess b’Arsenal iżdu xi ftit l-intensità u bdew jippressaw lil City b’mod aktar għoli fejn minkejja dan ftit li xejn kienu perikolużi għajr azzjoni personali lejn it-tmiem ta’ Leandro Trossard li spiċċat f’idejn Stefan Ortega, li kien qed jieħu post Ederson li jinsab mweġġa.
