“Jeħtieġ li nkomplu l-ġlieda għal governanza tajba billi nużaw għodod ġodda, nibnu alleanzi man-nies kollha ta’ rieda tajba, u nagħtu s-setgħa lis-soċjetà ċivili biex iżżomm lil dawk li jieħdu d-deċiżjonijiet taħt skrutinju kostanti,” qal l-uffiċjal tal-UE u kandidat għall-MEP Peter Agius wara li ltaqa’ ma’ Nick Aiossa, Direttur ta’ Transparency International, fi Brussell.
Transparency International hija l-organizzazzjoni globali ewlenija li għandha l-kompitu li tipprevjeni l-korruzzjoni u tippromwovi l-integrità billi żżomm skrutinju kostanti fuq l-aġenda tal-Istat tad-Dritt u t-Trasparenza fl-istituzzjonijiet tal-Unjoni Ewropea u l-Istati Membri tagħha.
Id-Direttur Nick Aiossa laqa’ l-inizjattiva tal-kandidat għall-MEP Peter Agius biex jiddiskuti ma’ Transparency International EU kif l-aġenda ta’ governanza tajba tista’ tiġi promossa f’Malta u fl-UE qabel l-Elezzjonijiet Ewropej tat-8 ta’ Ġunju.
Peter Agius qal li “Għaqdiet tas-soċjetà ċivili bħal Transparency International, jeħtieġ li jingħataw is-setgħa li jiżguraw aktar kontabbiltà fit-teħid tad-deċiżjonijiet, inkluż fl-użu tal-fondi tal-UE mill-UE u fl-Istati Membri. Irridu nkunu viġilanti sabiex it-taxxi li jkunu nġabru mingħand min ħadem u stinka, ma jispiċċawx fil-bwiet ħżiena.”
“Il-leġiżlatura li jmiss tal-Parlament Ewropew jeħtieġ li ssaħħaħ l-iskrutinju dwar l-użu tal-finanzjament tal-UE l-ewwel nett billi tipprovdi għal aktar trasparenza fuq proġetti ffinanzjati u r-riżultati effettivi tagħhom, u t-tieni billi tiżgura segwitu xieraq u koordinazzjoni mtejba mill-awtoritajiet nazzjonali u Ewropej bħall- Uffiċċju tal-Prosekutur Pubbliku Ewropew (UPPE) biex ineħħu b’mod effettiv il-korruzzjoni u l-frodi fl-użu tal-fondi tal-UE.”
“Huwa tabilħaqq inkwetanti li fl-ewwel rapport annwali tiegħu l-UPPE nnota 14-il każ kontinwu ta’ frodi minn fondi mill-UE f’Malta. Ilkoll irridu nagħmlu l-parti tagħna biex inżidu r-responsabbiltà u t-trasparenza. Ma nistgħux nirriskjaw li nħassru l-fiduċja tal-pubbliku,” qal Peter Agius.
Minbarra l-eliminazzjoni tal-frodi, irridu nevitaw ukoll każijiet ta’ użu ħażin fejn il-flus tal-UE ma jintużawx bl-aħjar mod u jonqsu milli jwettqu r-riżultati mwiegħda tagħha. Każ ċar bħal dan huwa s-70 miljun finanzjament tal-UE li jintefqu f’Malta fuq impjanti tad-drenaġġ. Il-kuntratturi tħallsu, iżda issa qed joħroġ ħafna aktar drenaġġ fil-bajjiet tagħna minn qatt qabel. Dan huwa inaċċettabbli. Huwa għalhekk li tlabt performance audit lill-Awditur Ġenerali biex nassigura ċarezza aħjar dwar ir-responsabbiltajiet f’dan il-qasam. Il-ħin tagħna fil-bajja dan is-sajf jiddependi minn dan!” temm jgħid Peter Agius.
