Żewġt irġiel li allegatament ħarbu bi flus kontanti f’serqa bl-armi minn uffiċċju fil-Għargħur ix-xahar li għadda, inżammu taħt arrest preventiv. Marin Minev ta’ 33 sena li ma jaħdimx, u Miroslav Mihalev, mekkanik ta’ 34 sena, it-tnejn ta’ nazzjonalità Bulgara, wieġbu mhux ħatja tas-serqa vjolenti li seħħet fit-22 ta’ Marzu, f’uffiċċju fi Triq Stiefnu Zerafa.
L-Ispettur Christina Delia qalet lill-Qorti li għall-ħabta tal-10am dakinhar tar-reat, żewġt irġiel lebsin crash helmets, daħlu fil-post, ordnaw lil persuna li kienet preżenti biex tgħaddi l-flus u ħarbu b’ammont mhux magħruf ta’ flus kontanti.
Waqt li kienu qed jaħdmu fuq filmati tas-CCTV mis-sit tas-serqa u informazzjoni miġbura mill-allegati vittmi kif ukoll xhieda oħra li kienu fil-viċinanzi meta seħħ l-inċident, l-investigaturi segwew il-binarji ta’ vettura partikolari.
Il-Pulizija kienu mgħarrfa li eżatt wara l-hold-up, instema’ ħoss ta’ revvjar u mutur, b’żewġ sewwieqa jidhru jaħarbu minn fuq il-post. Permezz ta’ cameras ta’ sorveljanza, il-pulizija segwew dik il-vettura sa Ħal Qormi, proprju sa Triq it-Tensila fejn kien joqgħod Mihalev.
Filmati reġistrati qabel is-serqa wrew lis-suspettati jsuqu tul Triq in-Naxxar u sejrin lejn Ħal Għargħur. Huma pparkjaw fi triq dejqa bejn żewġ showrooms fil-Mosta, imbagħad qasmu t-triq u daħlu f’Pama Supermarket fejn l-uffiċjal tas-sigurtà fil-bieb ordna lil wieħed mill-irġiel biex inżżel il-‘hoodie’.
Ir-raġel ġie identifikat bħala Minev li kellu tatoo distintiv. Sieħbu ma kien jilbes l-ebda elmu u lanqas hoodie. Huwa ġie identifikat faċilment bħala Mihalev, li kien ġie arrestat fuq inċident separat xi xhur qabel.
L-irġiel xtraw bott taż-żebgħa bl-isprej u marru lura lejn il-mutur. Mihalev sprejja l-elmu u l-mutur tiegħu bi sprej iswed, li jkopri stickers u marki distintivi oħra. Dik l-evidenza wasslet għal mandati ta’ arrest kontra ż-żewġ suspettati li ttieħdu f’kustodja kmieni t-Tlieta filgħodu meta l-Pulizija marret fi djarhom.
Kien l-Erbgħa li ż-żewġt irġiel ġew skortati l-Qorti, li flimkien qed jiffaċċjaw akkużi ta’ serq aggravat, li fil-ħin tal-hold-up kienu fil-pussess ta’ arma, u li volontarjament għamlu ħsara lil proprjetà ta’ terzi. Minev ġie akkużat separatament li sar riċediv.
Mihalev ġie mixli separatament li wettaq ir-reati matul il-perjodu operattiv ta’ sentenza sospiża mogħtija f’Diċembru li għadda.
Megħjuna minn interpretu Bulgaru, it-tnejn wieġbu li mhux ħatja. L-avukati tagħhom talbu l-ħelsien mill-arrest.
L-Avukat Franco Debono staqsa jekk saritx inkjesta maġisterjali. Il-prosekuzzjoni kkonfermat li nbdiet inkjesta eżatt wara s-serqa u l-investigazzjonijiet kienu għadhom għaddejjin. Mistoqsija jekk l-allegati vittmi kinux diġà xehdu quddiem il-maġistrat inkwirenti, il-prosekuzzjoni ma setgħetx tikkonferma dan.
It-talba għall-ħelsien mill-arrest kienet oġġezzjonata minħabba li l-proċeduri għadhom fi stadju bikri ħafna u l-investigazzjonijiet għadhom għaddejjin, anke minħabba li ssemma terza persuna mis-suspettati waqt l-interrogazzjoni.
Il-mara u s-sieħba tal-ko-akkużat intalbu jixhdu, it-tnejn li huma kkonfermaw li jekk tingħata l-libertà proviżorja kull akkużat kien se jgħix fid-dar tal-familja. Wara li semgħet ix-xhieda u s-sottomissjonijiet qosra tagħhom mill-partijiet, il-Maġistrat Yana Micallef Stafrace rrifjutat il-ħelsien mill-arrest u żammet iż-żewġt irġiel taħt arrest preventiv.
L-avukat tal-AĠ Brandon Bonnici u l-Ispetturi Christine Delia u Joseph Mallia mexxew il-prosekiuzzjoni. L-avukati Franco Debono, Marion Camilleri u Adreana Zammit kienu avukati ta’ Minev. L-avukat Adriano Spiteri kien avukat tal-għajnuna legali għal Mihalev.
