Impjegat ta’ maħżen min-Niġerja qed jiffaċċja akkużi ta’ ħasil ta’ flus wara li allegatament ġibed somma taħt l-€1,000 li kienet ġiet iddepożitata fil-kont bankarju tiegħu minn terza persuna. Jolly Agbonmware ta’ 37 sena, residenti s-Siġġiewi, ġie mixli quddiem il-Maġistrat Lara Lanfranco t-Tlieta, akkużat b’ħasil ta’ flus u mmaniġġjar ta’ oġġetti misruqa.
Huwa wieġeb mhux ħati u talab għall-ħelsien mill-arrest. L-avukati tal-imputat Mario Mifsud, Nicholas Mifsud u l-prokuratur legali Colin Galea, qalu lill-Qorti li l-klijent tagħhom ġie akkużat wara li ġibed inqas minn €1,000 li kienu ddepożitati fil-kont tiegħu minn terza persuna.
L-ispettur Clive Brimmer u l-prosekutur Dr. Nathaniel Falzon, mill-uffiċċju tal-Avukat Ġenerali, oġġezzjonaw għat-talba għall-ħelsien mill-arrest minħabba l-istatus ta’ immigrazzjoni rregolari tiegħu. Fil-Qorti ntqal li l-applikazzjoni tiegħu għal permess ta’ residenza f’Malta kienet ġiet miċħuda, iżda l-appell tiegħu kien “b’xi mod għadu pendenti”, li kien ifisser li Agbonmware ppreżenta riskju għoli li jaħrab.
“Mhu ta’ tħassib xejn, u se nispjega għaliex,” spjega l-avukat Nicholas Mifsud. “Għandi evidenza li turi li qed joqgħod Malta legalment, iżda l-prosekuzzjoni għadha kif qalet ukoll li l-istatus tiegħu bħalissa jinsab pendenti għall-appell, u għalhekk ma ngħatat l-ebda deċiżjoni finali. Jekk din ir-raġuni tintlaqa’, ma jkun hemm ebda skop li jsir appell għal deċiżjonijiet dwar l-immigrazzjoni.”
“Min iħaddmu qiegħed hawn fl-awla. Huwa jgħix legalment Malta u huwa impjegat legalment. L-argument tal-prosekuzzjoni huwa li l-istatus huwa illegali minħabba appell pendenti, li ma jagħmilx sens. Sadanittant huwa għandu permess li jaħdem f’Malta min-naħa tal-jobs plus”
L-Avukat Mario Mifsud ikkontesta l-fatt li l-klijent tiegħu kien tressaq taħt arrest, u qal lill-Qorti “kellna akkużati f’kawżi li jinvolvu aktar minn €20,000 li ġew akkużati b’ċitazzjoni, u li kisbu sentenzi sospiżi, iżda hawnhekk għandna arrest f’każ ta’ madwar €1,000”.
Dr. Falzon wieġeb li l-prosekuzzjoni ma kinitx qed tikkontesta l-permess tax-xogħol jew ta’ residenza tal-imputat, iżda kienet qed tikkontesta biss l-istatus ta’ immigrazzjoni tiegħu fl-oġġezzjonijiet tagħha għal-libertà proviżorja.
Fil-Qorti ntqal li s-sid tal-kumpanija li impjegat lill-imputat, Eurofreight Services, kienet preżenti fl-awla u kienet lesta li tagħti garanzija għalih. Hi ssejħet fil-pedana tax-xhieda biex tispjega aktar. Qalet li Agbonmware kien ilu jaħdem fl-imħażen tal-kumpanija, iħott u jgħabbi l-merkanzija minn Novembru tas-sena l-oħra, hija qalet, filwaqt li żiedet li hu kien miżżewweġ, b’żewġt itfal, u kien ilu jgħix Malta għal sentejn.
Il-Qorti tat lir-raġel il-libertà proviżorja kontra depożitu ta’ €1,000 u garanzija personali ta’ €3,000, li pprovda immedjatament. Lejn l-aħħar tas-seduta, l-akkużat deher kommoss għall-fatt li sid il-kumpanija għamlet tajjeb għalih għall-pleġġ.
