Fl-aħħar jiem ħarġet iktar minn qatt qabel l-inkompetenza tal-Gvern fejn tidħol il-kwistjoni tat-traffiku. Dan hekk kif il-poplu Malti u Għawdxi, jum wara l-ieħor qed ikompli jinqabad fi traffiku kbir f’kull ħin tal-ġurnata.
F’konferenza tal-aħbarijiet li saret fi Triq il-Kunsill tal-Ewropa, f’Ħal Luqa mix-Shadow Ministers, Mark Anthony Sammut, Joe Giglio u David Agius u mill-Kunsilliera Nazzjonalista, Andrew Cassar u Frederick Aquilina …il-PN tkellem dwar is-sitwazzjoni tal-biża’ li qed naraw fit-toroq Maltin.
Mark Anthony Sammut spjega kif taħt il-Labour rajna toroq li kontinwament jinqalgħu biex ftit wara jerġgħu jsiru mill-ġdid. Sitwazzjoni li qed twassal għal ħafna ħela ta’ ħin fit-traffiku u tniġġiż ma jaqta’ xejn.
Joe Giglio qal li s’issa għadha ma ngħatat l-ebda soluzzjoni għall-infrastruttura ta’ pajjiżna. Bi problemi fi tliet aspett; dak finanzjarju, dak tat-traffiku, u dak ambjentali.
Minn naħa tiegħu, il-kandidat tal-PN għall-Parlament Ewropew David Agius fisser kif fl-aħħar snin rajna Gvern Laburista b’nuqqas ta’ konsultazzjoni mal-Kunsill Lokali u kien hawnhekk fejn appella għal pjanar serju sabiex dawn is-sitwazzjonijiet jiġu evitati minnufih.
Din il-ġimgħa pajjiż sħiħ spiċċa iġġamjat fit-traffiku minħabba nuqqas ta’ pjanar minn naħa tal-Gvern; għaliex triq li kellha tiftaħ fil-5am, spiċċa fetħet aktar minn tliet sigħat wara – fl-eqqel tar-rush hour. Bil-Ministru jgħid li dan seħħ minħabba problemi fil-konkos.
