Żewġ ħaddiema Albaniżi spiċċaw feruti wara inċident li seħħ fi Triq Sir Luigi Preziosi, fil-Furjana.
Il-każ seħħ dalgħodu għall-ħabta tat-8:30am.
Sorsi qalulna li l-inċident seħħ meta kien qed jingħata xi konkos kmieni dalgħodu f’sit ta’ kostruzzjoni. Kaġun ta’ dan, sfronda saqaf ta’ binja li tinsab biswit dan is-sit. Net News jinsab infurmat li l-Albaniżi waqgħu tliet sulari.
S’issa l-kundizzjoni ta’ dawn il-ħaddiema għadha mhix magħrufa.
Fil-post waslu Pulizija, ambulanza kif ukoll membri tas-CPD.
Intant, diversi Furjaniżi li tkellmu ma’ dan is-sit qalulna li s-sidien tal-post fejn sfronda s-saqaf, telqu lejn Ħal Safi fl-aħħar jiem – propju għaliex beżgħu li se jaqa’ s-saqaf.
Dan il-każ seħħ f’anqas minn ġimgħa minn mindu seħħet it-traġedja ta’ Tas-Sliema; fejn hemm ukoll il-vittma kien Albaniż. Wara dik it-traġedja kien irriżenja l-Kap Eżekuttiv tal-BCA.
Ritratt: Francesco Catania
