Raġel ta’ 39 sena mill-Mosta li kien arrestat b’rabta ma’ qabda ta’ 700 gramma eroina kellu d-detenzjoni tiegħu mill-pulizija ddikjarata nulla wara li l-Qorti ddeċidiet li l-pulizija ma issodisfatx ir-rekwiżiti suffiċjenti biex tarrestah.
Stefano Montebello kien wieħed mit-tliet irġiel li tressqu l-Qorti l-Ħadd fuq qabda tad-droga li għamlet il-pulizija wara li waqqfet karozza f’Buġibba li rriżulta li kienet mimlija qratas li qishom ġew ippakkjati lesti biex jinbiegħu.
Il-karozza kienet qed tinstaq minn Pierre Cremona ta’ 50 sena. Montebello kien fil-karozza miegħu dak il-ħin. Fil-vettura saret tfittxija u rriżultat dak li kien suspettat li kien kokaina u eroina. B’Cremona u Montebello arrestati,il-pulizija kompliet tfittex f’residenza fil-Mosta, fejn sabu wkoll lil Owen Cremona ta’ 24 sena, li jiġi lit-tifel ta’ Pierre Cremona.
Fid-dar tal-Mosta l-pulizija skoprew borża maħsuba li fiha xi 700g eroina, pistola Les Baer, balal u oġġetti oħra relatati mad-droga. It-tliet irġiel ġew mixlija b’pussess ta’ eroina mhux maħsuba għall-użu personali tagħhom, pussess bla liċenzja ta’ arma tan-nar u li saru reċedivi.
Pierre Cremona u Montebello ġew akkużati wkoll b’pussess ta’ kokaina, filwaqt li Pierre ġie mixli separatament li kiser kundizzjonijiet tal-libertà proviżorja preċedenti. It-tlieta wieġbu mhux ħatja tal-akkużi.
L-avukati difensuri Franco Debono u Adreana Zammit oġġezzjonaw għall-arrest ta’ Montebello, għaliex, sostnew, l-arrest tiegħu ma kienx issodisfa b’mod adegwat ir-rekwiżiti kollha kif stipulati mil-liġi. Filwaqt li l-pulizija kienet kisbet mandat għall-arrest tal-missier u l-iben, ma kienx inkiseb wieħed għal Montebello, qalu l-avukati.
Barra minn hekk, Montebello sostna li l-pulizija ma kinitx infurmatu bir-raġuni għaliex kien qed jiġi arrestat, xi ħaġa li hija evidenti wkoll mill-filmat tal-body cam tal-korp tal-pulizija li kien esebita. Il-kodiċi kriminali, żiedu jgħidu l-avukati, jistipula li persuna trid tkun infurmata b’mod espliċitu li qed tiġi arrestata u għaliex tpoġġiet taħt arrest sabiex id-detenzjoni titqies valida.
Wara li semgħet argumenti miż-żewġ naħat, il-Maġistrat Rachel Montebello ddeċidiet favur id-difiża u ddikjarat li bis-saħħa li ma ġewx żvelati r-raġunijiet tal-arrest, allura l-arrest ta’ Montebello għandu jiġi ddikjarat illeġittimu. Hija ordnat il-ħelsien immedjat tiegħu.
Waqt li talbet il-ħelsien mill-arrest għal Owen Cremona, id-difiża qalet li filwaqt li l-eroina kienet instabet fir-residenza tal-Mosta, il-pulizija għad trid tipprova biżżejjed ta’ min kienet. Ħlief għal ftit multi tat-traffiku, iż-żagħżugħ kellu rekord kriminali nadif, huma qalu, u żiedu li kien lest li jgħix f’indirizz separat ma ‘ommu.
Il-prosekuzzjoni oġġezzjonat għall-ħelsien mill-arrest minħabba n-natura tar-reat u minħabba li Owen Cremona kien akkużat ukoll li sar reċediv. Il-Qorti tat lil Owen il-libertà proviżorja kontra depożitu ta’ €2,000 u garanzija personali ta’ €10,000. Huwa ġie ordnat ukoll josserva curfew u ma jersaqx lejn xhieda ċivili.
Talba għall-ħelsien mill-arrest għal Pierre Cremona ġiet miċħuda mill-qorti, li kkwotat ir-rekord kriminali tiegħu bħala r-raġuni ewlenija għaliex dan qed jiġi miċħud.
