Libjan li fil-Qorti qal li xogħlu hu li jqiegħed il-madum u li ġie akkużat li attakka raġel f’residenza f’Raħal Ġdid, nhar il-Ħamis li għadda nħeles mill-arrest wara li l-arrest tiegħu ġie ddikjarat invalidu. Mohammed Hamza, ta’ 37 sena, ġie mixli li pprova jpoġġi l-ħajja tal-allegata vittma tiegħu f’periklu ċar iżda volontarjament dak il-ħin stess waqqaf l-attakk tiegħu.
Huwa kien mixli wkoll li kkaġuna ġrieħi gravi u li volontarjament kiser il-paċi pubblika. Qabel ma nqraw l-akkużi, l-avukati tiegħu kkontestaw il-validità tal-arrest. Fil-Qorti ntqal li għall-ħabta tad-9.30am tal-Ħamis, raġel daħal fl-għassa ta’ Raħal Ġdid liebes flokk imtebba’ bid-demm u kellu d-demm fuq idejh u wiċċu.
Poġġa bilqiegħda fuq siġġu u uffiċjal staqsa jekk għandux bżonn għajnuna medika. Iżda r-raġel – aktar tard identifikat bħala Mohammed – wieġeb: “mhux jien. Xi ħadd ieħor”. Id-demm ma kienx tiegħu imma ta’ xi ħadd ieħor li kien għadu kemm argumenta miegħu, żied ir-raġel.
Intant, daħal it-tieni rapport dwar raġel li kellu bżonn l-għajnuna. Huwa kien ġie aggredit b’mazza u għodda li tintuża biex wieħed jaqta’ l-madum. Il-vittma qal lill-Pulizija li kien attakkat minn “ċertu Mohammed”.
Il-kuntistabbli fl-għassa tal-pulizija, waqt li kien qed jaġixxi taħt struzzjonijiet ta’ surġent, informa lil Mohammed li kien arrestat, spjega l-Ispettur tal-prosekuzzjoni Keith Rizzo. Il-maġistrat inkwerenti ġie infurmat bl-arrest fil-11am.
Id-difiża ħarġet fuq dik l-informazzjoni biex tikkontesta l-validità tal-arrest billi kkwotat l-artikolu 355AD(i) tal-Kodiċi Kriminali. “Il-liġi titkellem b’mod ċar,” sostna l-avukat Jacob Magri. F’każ ta’ attendenza volontarja f’għassa tal-pulizija, l-arrest għandu jkun awtorizzat minn spettur u l-maġistrat għandu jiġi infurmat “minnufih”, żied jgħid.
L-ispettur tal-prosekuzzjoni qal li kien qallu bl-arrest “fi ftit minuti”. Iżda wara li semgħet aktar sottomissjonijiet, il-Qorti, ippreseduta mill-Maġistrat Leonard Caruana, iddikjarat li l-arrest ma kienx konformi mal-liġi.
L-akkużat inħeles mill-arrest. Imbagħad wieġeb mhux ħati. Il-Qorti laqgħet talba għal ordni ta’ protezzjoni favur il-vittma. Fid-dawl tal-gravità tal-akkużi, il-fatt li l-vittma kienet għadha trid tixhed u r-riskju li taħrab, il-Qorti laqgħet it-talba tal-prosekuzzjoni biex jiġu imposti kundizzjonijiet fuq l-akkużat, għalkemm ma kien hemm l-ebda pleġġ.
Il-Qorti ordnat lill-akkużat biex ma javviċina l-ebda xhud tal-prosekuzzjoni, biex jattendi s-seduti kollha tal-Qorti, biex ma jaħrabx u jorbot lilu nnifsu taħt garanzija personali ta’ €3,000.
L-avukat tal-AĠ Kaylie Bonnet u l-Ispettur Keith Rizzo mexxew il-prosekuzzjoni. L-avukati Alfred Abela, Jacob Magri u Rebecca Mercieca kienu l-avukati difensuri.
