Raġel ġie mixli li weġġa’ gravi lis-sieħba tiegħu, aggrediha, insuletaha u heddidha. Huwa kien akkużat ukoll b’fastidju, li wassalha biex tibża’ mill-vjolenza u volontarjament kiser il-paċi pubblika. L-attakk allegatament seħħ fid-dar tal-koppja f’Birkirkara nhar l-Erbgħa.
Il-Ħamis filgħodu l-mara marret tagħmel qadja f’ħanut tal-annimali domestiċi fil-qrib u wara waqfet f’bar biex tixtri s-sigaretti. Nies fil-ħanut innutaw il-ġrieħi li kellha f’wiċċha u avżaw lill-Pulizija. L-uffiċjali marru l-bar u l-mara ttieħdet l-isptar b’ambulanza waqt li s-sieħeb tagħha ġie arrestat.
Fil-Qorti l-Ġimgħa, ir-raġel ta’ 35 sena wieġeb mhux ħati. L-avukat tiegħu, Martin Fenech, irribatta l-allegazzjonijiet u qal li l-allegata vittma weġġgħet lilha nnifisha f’waqgħa. “Kien tort tagħha,” huwa qal. It-talba għal pleġġ sabet l-oġġezzjoni tal-prosekuzzjoni minħabba li l-vittma kienet għadha trid tixhed.
Ingħad ukoll li kien hemm biża’ kbira li titbagħbas l-evidenza, filwaqt li n-natura tar-reati kienet serja. Fid-dawl ta’ dawn is-sottomissjonijiet, il-Qorti, ippreseduta mill-Maġistrat Leonard Caruana, irrifjutat it-talba għal pleġġ u laqgħet talba għal ordni ta’ protezzjoni favur il-vittma.
Il-Qorti laqgħet ukoll talba għal projbizzjoni fuq isem il-vittma biex tiġi evitata l-vittimizzazzjoni mill-ġdid. L-avukat tal-AG Jurgen Dalli u l-Ispettur Colin Sheldon ipproċessaw.
