Għad ma hemm l-ebda data stabbilita għal meta se jibda jinstema’ l-każ kriminali fil-konfront ta’ Joseph Muscat, Keith Schembri, Konrad Mizzi, Edward Scicluna, Chris Fearne u ħafna oħrajn li jinkludu diversi Segretarji Permanenti f’diversi Ministeri, u nies oħrajn viċin il-Partit Laburista.
Dawn qed jiffaċċjaw akkużi li jinkludu korruzzjoni, frodi u ħasil ta’ flus b’rabta mal-ftehim kontroversjali biex jiġu privatizzati tliet sptarijiet tal-istat. Il-provi għandhom jibdew jinstemgħu mill-Maġistrat Rachel Montebello, li għad trid tagħti data għas-smigħ.
Joseph Muscat, Eks MEP li kien Prim Ministru mill-2013 sal-2020, l-Eks Kap tal-istaff tiegħu Keith Schembri u l-Eks Ministru Konrad Mizzi, huma fost aktar minn 19-il persuna mixlija wara l-konklużjoni tal-inkjesta dwar allegata korruzzjoni meta t-tliet sptarijiet inbiegħu lill-Vitals Global Healthcare Group fl-2016.
Il-persuni se jitressqu l-Qorti b’ċitazzjoni. Il-ġimgħa li għaddiet li Chris Fearne, il-Ministru tal-Fondi tal-UE għal Malta, se jkun ukoll wieħed mill-akkużati fejn mistenni jiġi akkużat b’rabta mal-ftehim tal-isptarijiet, anke jekk mistenni li jiġi akkużat b’reati anqas gravi minn ta’ sħabu.
Jidher li l-aktar akkuża serja hi li Muscat kien irċieva €60,000 mingħand Accutor AG, kumpanija Żvizzera marbuta mal-grupp Amerikan Steward Health Care, li ħadet f’idejha l-kuntratt tal-isptarijiet mingħand Vitals Global Healthcare fl-2018. Muscat, minn naħa tiegħu, dejjem ċaħad kull att ħażin.
F’post fuq Facebook, Muscat kien qal: “Din m’għadhiex biss vendetta politika, imma ttrasformat ruħha f’disgrazzja fejn il-ħajja ta’ għexieren ta’ nies qed tintefa’ f’miżbla burokratika għal snin sħaħ għall-konvenjenza ta’ xi wħud.”
Żied jgħid: “Dawk kollha li mċappsa b’din l-inġustizzja, jew ħaslu idejhom milli jipprovaw jikkoreġuha, jiġu ġġudikati bl-aktar mod aħrax mill-poplu minnufih, bil-ġustizzja matul is-snin u bl-istorja għal dejjem. Jien lest għall-ġlieda kontra min irid jivvendika lill-Maltin.”
Joseph Muscat kien ċeda l-poter f’Jannar 2020 fost pressjoni dejjem tikber fuq il-qtil tal-ġurnalista Daphne Caruana Galizia, li nqatlet f’Ottubru 2017 wara li splodiet karozza bomba barra d-dar tagħha.
