Raġel li qed jiffaċċja akkużi b’rabta ma’ qabda ta’ 700 gramma eroina ingħata l-libertà proviżorja. Pierre Cremona ta’ 56 sena kien qed isuq karozza u meta saret tfittxija mill-pulizija fiha, nstabet li kien fiha qratas tal-eroina.
L-uffiċjali mbagħad fittxew f’dar tal-Mosta fejn hemm kien hemm iben Cremona ta’ 24 sena u borża li kien fiha 700 gramma tad-droga. Cremona, ibnu u raġel li kien qed jakkumpanjahom fil-karozza ġew kollha arrestati u akkużati b’pussess ta’ eroina mhux maħsuba għall-użu personali tagħhom.
Tard ix-xahar li għadda, il-passiġġier tal-karozza, Stefano Montebello, spiċċa bħala raġel ħieles wara li l-qorti ddikjarat l-arrest tiegħu bħala wieħed null u bla effett. L-avukati ta’ Montebello wrew li l-prosekuturi naqsu milli jiksbu mandat għall-arrest tiegħu u naqsu milli jinfurmawh dwar ir-raġuni li kien qed jiġi arrestat.
Iben Cremona, Owen, ingħata l-libertà proviżorja wkoll wara li tressaq il-Qorti. Din il-ġimgħa, qorti semgħet ix-xhieda ta’ diversi uffiċjali tal-pulizija involuti f’qabda tad-droga. Fi tmiem is-seduta u wara talba mill-avukati tiegħu, il-maġistrat Elaine Rizzo qablet li tagħti lil Cremona ħelsien mill-arrest fuq depożitu ta’ €5,000 u €10,000 garanzija personali.
Irid ukoll jiffirma l-Għassa tal-Pulizija ta’ Ħal Qormi kuljum u jibqa’ ġewwa bejn id-9pm u s-6am. L-avukati Franco Debono, Marion Camilleri u Adreana Zammit qed jirrappreżentaw lil Cremona.
