University of Malta ACJ Group u Luxol St Andrew’s huma l-finalisti tal-Enemed Futsal League meta fis-semifinali għelbu lill-avversarji rispettivi tagħhom.
Iċ-champions Luxol għelbu lil ŻRQ Bormla 9-2 f’logħba li huma ddominaw għal ħafna ħinijiet. It-tim immexxi minn Gabriel Dobre stabbilixxa vantaġġ ta’ 5-1 sa tmiem l-ewwel taqsima u baqa’ konsistenti sabiex kiseb id-dritt li jilgħab fil-finali.
Mark Zammit, Andy Mangion u Jhon Castro Pulido skorjaw doppjetta kull wieħed filwaqt li Andre Ciancio, Emil Raducu u Jefferson Breno żiedu aktar gowls għat-tim tagħhom.
Il-Bormliżi kellhom lil Rodrigo da Silva jiskorja doppjetta.
Referees kienu Jacob Van Dijke Willen u Dyon Koene.
University of Malta ACJ Group għelbu lil Swieqi United
University of Malta ACJ Group għelbu lil Swieqi United 10-5 f’logħba sabiħa u mimlija emozzjonijiet.
L-Universitarji kienu 3-2 minn fuq sa tmiem l-ewwel taqsima, bi Swieqi li dejjem baqgħu mal-avversarji u kien biss fl-aħħar li ċedew.
Raimundo Nonato da Silva skorja tliet gowls, Guillherme Fonseca kien awtur ta’ doppjetta filwaqt li Cleavon Portelli, Kaue Meggiato, Steven Camilleri, Andre Cachia u awtogowl ta’ Brandon Debono niżżlu isimhom fost l-iskorers.
Għal Swieqi, Bryan Stiven skorja doppjetta filwaqt li Brandon Debono, Ryan Muscat u Roller Santiago skorjaw gowl kull wieħed.
Referees kienu Daniele D’Adamo u Nicolo Lerza.
L-Universita ta’ Malta u Luxol jiltaqgħu għall-ewwel finali għada l-Erbgħa sabiex il-Ġimgħa ssir it-tieni finali bil-logħbiet jibdew fid-8.45pm.
Semifinali tal-Enemed Challenger League
Mill-banda l-oħra, kien hemm ukoll is-semifinali tal-Enemed Challenger League fejn Ta’ Xbiex u Birżebbuġa St Peter’s kisbu post fil-finali.
Ta’ Xbiex għelbu lil Marsaskala 9-1 bil-plejer Kolombjan Juan David Bautista Conde jispikka bi tliet gowls. Stefi Cale, Liam Caruana, Ryan Debono u George Frendo kellhom is-sodisfazzjon li jiskorjaw gowl kull wieħed.
Amir Ashtiyani skorja l-uniku gowl għal Marsaskala.
Referees kienu Andrea Naudi u Marco Orazio La Rosa.
Birżebbuġa St Peter’s għelbu lis-selezzjoni Maltija ta’ taħt id-19-il sena
Birżebbuġa St Peter’s xejn ma sabuha faċli sabiex jegħlbu lis-selezzjoni Maltija ta’ taħt id-19-il sena 5-3.
Armando Gjepali u Dale Vella skorjaw doppjetta kull wieħed filwaqt li Hamza Harrat żied ieħor għat-tim min-naħa t’isfel ta’ Malta.
Iż-żgħażagħ Maltin sabu x-xibka permezz ta’ Mason Agius, Robert Malool u Jamie Sultana.
Referees kienu Clinton Cassar u Stephen Vella.
