Malta issa qiegħda fl-aħbarijiet ta’ barra wkoll, bl-aġenzija tal-aħbarijiet Reuters tippubblika artiklu fejn tgħid li tressqu akkużi ta’ frodi u miżapproprjazzjoni ta’ fondi kontra l-Gvernatur tal-Bank Ċentrali ta’ Malta Edward Scicluna u d-Deputat Prim Ministru Chris Fearne. Fost dawk akkużati hemm ukoll l-Eks Prim Ministru Joseph Muscat, flimkien maċ-Chief of Staff tiegħu u Eks Ministru tas-saħħa.
Dawn l-akkużi ġejjin minn skandlu dwar il-privatizzazzjoni ta’ tliet sptarijiet tal-istat lura fl-2015, li qanqal inkjesta ta’ erba’ snin mibdija mill-Għaqda Repubblika. Il-ftehim xokkanti, stmat għal €4 mitt miljun, ġie annullat aktar kmieni din is-sena minħabba frodi.
Scicluna kien Ministru tal-Finanzi u Fearne kien Junior Minister tas-saħħa fiż-żmien tal-ftehim. Scicluna, li huwa membru tal-Kunsill Governattiv tal-Bank Ċentrali Ewropew, ma kkummentax dwar l-akkużi, iżda aktar kmieni kien ċaħad kull aġir ħażin. Fearne ċaħad l-akkużi kollha.
L-Eks Prim Ministru Joseph Muscat, iċ-Chief of Staff tiegħu Keith Schembri u l-Eks Ministru Konrad Mizzi qed jiffaċċjaw akkużi ta’ ħasil ta’ flus, korruzzjoni, tixħim, u twaqqif ta’ assoċjazzjoni kriminali. It-tlett irġiel ċaħdu l-akkużi.
Ir-riżultat ta’ dan l-iskandlu wassal saħansitra għal mistoqsijiet serji dwar it-tmexxija politika ta’ Malta, bil-Prim Ministru Robert Abela jiddefendi l-integrità ta’ Fearne, iżda jħalli inċertezza dwar in-nomina tiegħu bħala l-Kummissarju Ewropew li jmiss ta’ Malta.
