Il-Kunsill tal-Unjoni Ewropea ħabbar l-adozzjoni tad-Direttivi tal-UE dwar l-Istandards għall-Korpi tal-Ugwaljanza, pass ewlieni lejn infurzar aħjar tal-liġijiet tal-UE dwar it-trattament ugwali. Din il-leġiżlazzjoni li għadha kif ġiet adottata, tiżgura t-tgawdija tad-drittijiet tal-ugwaljanza minn kulħadd f’kull Stat Membru billi tagħti s-setgħa lill-Korpi tal-Ugwaljanza madwar l-Ewropa b’mandat usa’, riżorsi addizzjonali, aktar setgħat u indipendenza.
Patrick Charlier, President tal-Bord Eżekuttiv tal-Equinet u Ko-Direttur ta’ Unia, wieħed mill-Korpi Belġjani għall-Ugwaljanza, ikkummenta dwar din il-kisba storika, u qal: “L-adozzjoni tal-lum tad-Direttivi dwar l-Istandards għall-Korpi tal-Ugwaljanza hija pass kbir ’il quddiem għall-ugwaljanza fl-Ewropa. Aktar minn biċċa leġiżlazzjoni teknika, dawn id-direttivi ser jiżguraw aċċess aktar ugwali għall-ġustizzja faċilment disponibbli għal dawk kollha li għadhom jesperjenzaw diskriminazzjoni fl-Ewropa.”
Il-Ko-Diretturi ta’ Equinet Anne Gaspard u Tamás Kádár irrikonoxxew li: “l-adozzjoni ta’ din il-leġiżlazzjoni hija xhieda tal-valuri Ewropej tal-ugwaljanza u d-dinjità umana. Dan huwa l-qofol ta’ snin ta’ xogħol iebes mit-tim, il-membri, u l-imsieħba tagħna. Equinet hija l-aktar grata għall-ħidma li saret mill-Kummissjoni Ewropea u b’mod partikolari minn Helena Dalli bħala Kummissarju għall-Ugwaljanza, il-Presidenza Żvediża, Spanjola u Belġjana tal-Kunsill, kif ukoll il-kumitati u l-korelaturi tal-Parlament Ewropew, li kienu essenzjali għal din il-konklużjoni.”
Fil-mixja ’l quddiem, l-involviment tal-Istati Membri se jkun fundamentali matul il-perjodu ta’ traspożizzjoni, kif ukoll il-gwida u l-monitoraġġ rigoruż mill-Kummissjoni Ewropea l-ġdida. Equinet tittama għall-ħatra ta’ Kummissarju ġdid għall-Ugwaljanza b’kapaċità u ambizzjoni qawwija, għaliex ċertament jistgħu jipprovdu lill-Istati Membri b’aktar appoġġ siewi dwar din il-missjoni.
