Francis Zahra ta’ 53 sena minn Birżebbuġa, ma nstabx ħati li stupra mara barranija f’parkeġġ f’Ħal Far, iżda ngħata sentenza sospiża wara li ammetta li offenda l-pudur b’għemil li sar fil-pubbliku meta kellu relazzjoni sesswali f’parkeġġ.
Il-Maġistrat Astrid May Grima semgħet lill-prosekuzzjoni tgħid li fl-4 ta’ Marzu tal-2017, f’Ħal Far, stupra u ħebb għal mara. Madankollu huwa ma nstabx ħati ta’ dawn l-akkużi wara li mit-testijiet mediċi ħareġ li l-mara ma kellha ebda sinjali ta’ vjolenza u li l-istupru ma ġiex ippruvat.
Ir-raġel kien mixli li wettaq dan ir-reat f’xi ħin bejn it-3am u l-11am. Minbarra li wettaq l-istupru, huwa kien akkużat wkoll li ħebb għaliha u kkaġunalha ferita ħafifa u li offenda l-pudur jew il-morali b’għemil żieni f’post pubbliku.
It-tfajla allegat mal-Pulizija li wara li kienu qed jixorbu f’ħanut tax-xorb, huwa offrielha li jwassalha d-dar imma spiċċa ħadha Ħal Far. Fil-Qorti nstemgħet ix-xhieda tal-Pulizija, li qalu li huma ġew infurmati li kien seħħ stupru fuq mara barranija.
Instema’ kif il-mara kienet għamlet lejl tixrob l-alkoħol f’każin f’Birżebbuġa u meta ġiet biex titlaq, talbet lill-akkużat biex iwassalha. Il-mara qalet li beda jeħodha postijiet differenti u raqdet fil-karozza. Tenniet li x’ħin qamet sabitu jkollu x’jaqsam magħha sesswalment.
Il-Pulizija spjegat li min-naħa tiegħu, ir-raġel kien mar l-għassa jirrapporta li mara kienet għamlitlu ħsara fil-karozza meta bdiet tkisser u tagħti bis-sieq fuq il-karozza tiegħu. Zahra kien qal lill-Pulizija li beda jistaqsiha fejn toqgħod u ma bdietx tkellmu u ddeċieda li jmur lejn il-Port Ħieles u waqaf fil-parkeġġ u wara mar Ħal Far u waqaf jixtri ħobża u flixkun ilma. Wara mar fl-għalqa u stenna xi erba’ sigħat għax kienet mitlufa minn sensiha u ma bdietx twieġbu.
Qal li meta ġiet f’sensiha kellhom x’jaqsmu flimkien. Ammetta li kellhom relazzjoni sesswali iżda qal li kienet bil-kunsens tagħha. Qal li x’ħin ħarġet mill-karozza hu ċempel lill-Pulizija. Il-mara tat verżjoni differenti u qalet li x’ħin indunat li ġiet stuprata ġiet isterika u bdiet tagħti bl-addoċċ.
Qalet li għamlet minn kollox biex timbuttah iżda beda jżommha. Saħqet li kienet miżżewġa u żewġha kien xogħol ta’ bil-lejl u ħarġet tixrob biex tiċċelebra għax sabet impjieg ġdid. Il-barman tal-ħanut tax-xorb xehed li kif hu għalaq il-bar riedet tmur miegħu iżda ma ridhiex u qabdet u daħlet fil-karozza tal-akkużat.
Saħaq li kien sema’ x’ġara iżda ma setax jemmen. Qal li wara li żżewġet, il-mara kienet kuljum tmur il-bar tixrob sa filgħodu u żewġha kien jibgħatlu messaġġi u jistaqsi fejn hi martu u x’qed jiġri. Qal li filgħodu kien ikollha xi tgħid ma’ żewġha u kienet tmur għandu bil-bagajla biex toqgħod miegħu.
Xehed li dakinhar kienet fis-sakra u bdiet tkisser it-tazzi. Il-Qorti semgħet ukoll kif fit-testijiet mediċi, li saru minn gyne, ma sab ebda tbenġil jew sinjal ta’ trawma u meta eżaminaha sab kollox normali. Il-Qorti kkunsidrat li kienet xorbot ħafna u li kellha xi tgħid ma’ xi nies tant li l-barman kien keċċiha iżda kienet marret lura.
Il-Qorti qalet ukoll li mit-testijiet tal-gyne, ma kien hemm ebda sinjal ta’ vjolenza iżda rriżulta li kien hemm l-att sesswali. L-imputat kien ammetta li kellhom relazzjoni sesswali u li kien kollox konsenswali u wara li lestew qaltlu li ma riditx tmur id-dar.
Wara li qieset it-testijiet mediċi, il-Qorti ma sabitx lill-akkużat ħati ta’ stupru għax qalet li dan ma ġiex ippruvat. Hija sabitu ħati li offenda l-pudur b’għemil li sar fil-pubbliku wara li ammetta għall-akkuża u tagħtu tliet xhur ħabs sospiżi għal sena u mmultatu €500.
