Tħabbret il-mewt ta’ Victor Tabone li kien wieħed mill-ewwel preżentaturi ta’ Radio 101 fis-snin disgħin.
Tabone huwa mill-Furjana u miet fl-età ta’ 65 sena.
Victor Tabone – magħruf bħala l-Mitch – kien parti mill-grupp tal-1991 li flimkien fetħu Radio 101 – John Bundy, Charles Saliba, Monica Attard u tant ohrajn. Huwa kien ukoll DJ it-Topaz.
Tabone kien deskritt bħala raġel li affaċċja diversi sfidi f’ħajtu, iżda minkejja dan kollu xorta kien jagħmel minn kollox sabiex iwassal programmi ta’ kwalità lis-semmiegħa ta’ Radio 101. Oħrajn iddeskrivewh ukoll bħala ħabib ġenwin li kont tieħu gost tkun fil-kumpanija tiegħu.
Il-Kap tal-PN Bernard Grech fisser lil Victor Tabone bħala “pijunier ta’ Radio 101”.
Kien bosta l-preżentaturi ta’ Net FM u Radio 101 li sellmu l-memorja tal-Mitch. Fost dawn, l-eks Segretarju Ġenerali tal-PN Clyde Puli li kien wieħed mill-ewwel preżentaturi fuq l-istazzjon tar-radju tal-Partit Nazzjonalista fil-bidu tas-snin Disgħin.
