Il-kowċ Taljan Roberto De Zerbi mhux se jibqa’ kowċ ta’ Brighton hekk kif dan ġie żvelat mill-klabb stess permezz tal-midja soċjali.
De Zerbi ilu fil-kariga minn Settembru ta’ 2022, fejn ħa post Graham Potter li dak iż-żmien ingħaqad ma’ Chelsea. Il-partita t’għada kontra Manchester United se tkun l-aħħar partita tat-Taljan mas-Seagulls.
Taħt it-tmexxija tiegħu Brighton waslu sas-semi finali tal-Fa Cup l-istaġun li għadda, fejn inqalgħu bil-penalties kontra Manchester United. Fl-istess staġun De Zerbi ggwidahom f’post mal-ewwel sitta u kwalifikazzjoni għall-UEFA Europa League.
Dan l-istaġun kien inqas pożittiv għas-Seagulls li bħalissa jinsabu fl-għaxar post u nqalgħu mill-Europa League fil-fażi tal-aħħar sittaw kontra Roma.
