Colin Schembri
Depiro …………………… 45
Caffè Moak Luxol……60
(10-19)(18-13)(9-18)(8-10)
Caffè Moak Luxol żammew ħajjin it-tamiet li jerbħu l-kampjonat meta fit-tielet finali kisbu r-rebħa kontra Depiro 60-45 biex issa hemm bżonn ir-raba’ u possibilment il-ħames partita biex jiġi deċiż dan il-kampjonat. Din id-darba, Luxol baqgħu ordinati fid-difiża mhux kif ġralom f’partiti oħrajn anzi kienu huma li ħasdu lill-avversarji b’run ta’ 10-0 fit-tielet sessjoni. L-esperjenza ta’ players bħal Mandi Mercieca u Josephine Diaby flimkien mal-wirja tal-Amerikana Tayler Bennett kienu strumentali għal Santino Coppa f’dan il-konfront. Kif ġara fiż-żewġ finali ta’ qabel kienu Luxol li ħadu l-ewwel vantaġġ wara punti minn Diaby, Anna Fenech Pace u Tayler Bennett. Depiro kellom risposta minn Sophie Abela u Kristy Galea iżda Luxol komplew b’run ta’ 9-2 kolla minn Bennett u A. Fenech Pace biex fit-tmien minuta kienu 13-4 minn fuq. Basket ta’ Julia Borg ta ftit tan-nifs lil Depiro però Luxol kabbru d-distakk permezz ta’ Diaby u Bennett. Qabel intemmet is-sessjoni trippla ta’ Julia Borg naqqset id-distakk għal skor ta’ 10-19. Fit-tieni sessjoni Depiro fetħu b’basket ta’ Claire Ciantar u trippla ta’ Abela biex naqqsu d-distakk għal sitt punti. Luxol ukoll kellom trippla minn Bennett flimkien ma’ Sarah Fenech Pace. Huma komplew b’run ta’ 8-2 li tatom vantaġġ ta’ 10 punti 32-22. Depiro però fl-aħħar żewġ attakki sabu żewġ trippli minn Leanne Sciberras u Abela biex fl-intervall Luxol kienu 4 minn fuq 32-28.
It-tielet taqsima fetħet b’erba’ punti fuq kull naħa biex sa’ nofs is-sessjoni d-distakk baqa’ ta’ 4 punti 32-36. Mandi Mercieca kabbret il-vantaġġ tal-vjola però Kristy Galea malajar wieġbet bi trippla għal Depiro. Luxol irkupraw u trippla ta’ Mercieca u basket ta’ Bennett rawhom imorru 45-37 minn fuq fit-tmien minuta. Aktar punti minn Bennett u trippla oħra ta’ Mercieca flimkien ma’ sensiela ta’ free-throws żbaljati minn Depiro raw lil Luxol itemmu t-taqsima 50-37 minn fuq. Fl-aħħar sessjoni Depiro fetħu b’basket ta’ Borg segwit minn 4 punti ta’ Luxol li ġew minn A. Fenech Pace u Diaby. Depiro ma setgħux jinfdu d-difiża agressiva ta’ Luxol u s-shooting minn barra ma kienx effettiv u Luxol setgħu jibqgħu jikkontrollaw sat-tmiem biex ħarġu rebbieħa 60-45.
Depiro: S. Abela 12, N. Agius, J. Xerri 2, J. Mallia, L. Sciberras 3, N. Agius, C. Ciantar 4, J. Borg 9, J. A. Johnson 9, M. Micallef, K. Galea 6, L. Camilleri.
Caffè Moak Luxol: T. Bennett 11, M. Mercieca 8, L. Fenech Pace, N. Vella, E. Abela, M. Camilleri, S. Fenech Pace 14, J. Diaby 16, V. Baldacchino, S. Sciberras, S. Farrugia, A. Fenech Pace 11.
Referees: Gordon Barbara, Nicky Azzopardi, Miguel De Flavia
