Il-klabb ta’ Birżebbuġa ASC ħabbar maratona ta’ għawn ta’ 24 siegħa min-Nursery tal-Waterpolo tiegħu f’tentattiv li jinkiseb rekord ġdid għal Malta.
Din il-maratona se ssir fil-pool tal-klabb stess. Dan l-avveniment se jibda s-Sibt, 25 ta’ Mejju f’nofsinhar, u se jintemm l-għada, il-Ħadd, 26 ta’ Mejju f’nofsinhar.
Dan l-avveniment straordinarju, organizzat minn Birżebbuġa ASC, għandu l-għan li juri d-dedikazzjoni u l-istamina tal-plejers żgħażagħ tal-klabb tal-waterpolo. Il-pubbliku huwa mistieden jattendi biex jara dan l-avveniment inkredibbli u jagħti l-appoġġ tiegħu lill-parteċipanti li jkunu qed jagħtu ħilithom biex jirnexxilhom jaslu għal dan ir-rekord.
Minbarra l-maratona tal-għawm, se jkun hemm programm sħiħ ta’ attivitajiet li se jsiru fil-kumpless ta’ Birżebbuġa matul dawn l-24 siegħa, biex b’hekk kull min jattendi żgur li se jieħu pjaċir.
Barra minn hekk, id-dħul minn dan l-avveniment se jmur għal żewġ għaqdiet filantropiċi, “Puttinu Cares” u “Thiago’s Journey”. Dan ikompli juri kemm il-kuxjenza tan-nursery taż-żgħażagħ ta’ Birżebbuġa ASC hija ffukata fuq il-komunità.
Għal aktar informazzjoni u aġġornamenti, żur il-paġna ta’ Facebook: Birzebbuga ASC.
