Residenti ġew ordnati jibqgħu fi djarhom
Numru ta’ vetturi tal-Protezzjoni Ċivili ssejħu lejn iz-zona tal-Ħandaq wara li żviluppaw nirien għall-ħabta ta’ nofsinhar.
Sorsi qalulna li n-nar żviluppa f’xi għelieqi, viċin Triq l-Imdina. Fl-istess akkwati hemm ukoll xi djar, tant li r-residenti ġew ordnati jibqgħu ġewwa bil-bibien u t-twieqi magħluqa.
Net News jinsab infurmat li n-nar infirex lejn numru ta’ tyres u kontejners li wkoll spiċċaw fjamma waħda – tant li d-daħna sewda dehret minn diversi lokalitajiet fiċ-ċentru ta’ Malta.
Kien għalhekk li nġiebu ħames bowsers biex jinxteħet l-ilma, u jiġi kontrollat in-nar.
Iz-zona ġiet kompletament magħluqa.
Mhux eskluż li fl-għelieqi hemm ukoll xi annimali.
Il-Pulizija kkonfermaw li ħadd ma weġġa’ f’dan l-inċident.
