Raġel ta’ 65 sena residenti Birkirkara, weġġa’ gravi wara li ħabat f’vettura pparkjata bil-konsegwenza li nqaleb bil-karozza.
L-inċident seħħ il-Ħadd tard waranofsinhar, għall-ħabta tal-5:00, fi Triq il-Wied, l-Iklin.
Il-Pulizija marret fil-post u minn stħarriġ preliminari li sar irriżulta li karozza misjuqa minn raġel inqalbet wara li ħabtet f’vettura pparkjata.
Passiġġieri fl-istess vettura kien hemm żewġ nisa ta’ 65 sena u 74 sena residenti Birkirkara.
Huma ngħataw l-għajnuna minn tim mediku u ttieħdu l-Isptar Mater Dei b’ambulanza għall-kura meħtieġa.
Aktar tard, ix-xufier kien ċċertifikat li sofra ġrieħi gravi filwaqt li ż-żewġ nisa sofrew ġrieħi ħfief.
Il-Pulizija għaddejja bl-investigazzjonijiet fuq il-każ.
