Il-Prim’Awla tal-Qorti Ċivili ddikjarat li l-General Workers Union kisret l-obbligi kuntrattwali tagħha meta kriet partijiet mill-kwartieri ġenerali tagħha fil-Belt lil ARMS Ltd u Sciacca Grill Ltd, iddikjarat il-Qorti l-Ħamis, li annullat iż-żewġ kirjiet.
Is-sentenza ngħatat fi proċeduri ċivili mressqa kontra l-union mill-Eks Kap tal-Oppożizzjoni Simon Busuttil fl-2017 wara s-sejbiet tal-Awditur Ġenerali li rrapporta li l-union kisret l-obbligi kuntrattwali tagħha u rrakkomandat azzjoni tal-Qorti kontriha.
Peress li ma ttieħdet l-ebda azzjoni mill-Gvern Laburista, l-Oppożizzjoni ressqet kawża quddiem il-Prim’Awla, Qorti Ċivili fejn ikkontestat il-validità taż-żewġ kuntratti ta’ kiri. Kollox beda meta l-union kriet partijiet mill-bini fi Triq Nofsinhar, kantuniera ma’ Triq l-Ifran, il-Belt Valletta fl-2014.
It-tilwima qamet fuq żewġ kuntratti li permezz tagħhom il-union kienet oriġinarjament ingħatat il-fond taħt titolu ta’ emfetewsi perpetwu mill-Kummissarju tal-Artijiet ta’ dak iż-żmien. L-ewwel kuntratt ġie ffirmat fi Frar 1957 fl-atti tan-nutar Victor Miller.
F’Diċembru 1997, wara riżoluzzjoni parlamentari, dan il-kuntratt ġie emendat biex jippermetti lill-union li tassenja partijiet mill-propjetà taħt titolu fuq enfitewsi jew kiri għal skopijiet kummerċjali. Iżda kien biss sakemm il-union żammet 51% tal-isħma fin-negozju li lilhom kienet mikrija l-propjetà.
Madankollu fl-2014, il-GWU kriet parti mill-propjetà ta’ Triq Nofsinhar lil Kasco Foods Ltd, illum Sciacca Grill Ltd. Kriet ukoll parti oħra mill-propjetà ta’ Triq l-Ifran lil ARMS Ltd b’kera annwali ta’ €61,950. L-Oppożizzjoni argumentat li ż-żewġ kirjiet kisru t-termini tal-konċessjoni enfitewtika kif ukoll ir-riżoluzzjoni parlamentari f’termini tal-Att dwar id-Disponiment tal-Artijiet tal-Gvern.
Il-union ma ssodisfatx il-kundizzjoni tal-azzjonist maġġoritarju. Il-qorti, ippreseduta mis-Sur Imħallef Mark Simiana, ikkonkludiet li dan “manifestament ma kienx il-każ.” Il-kirjiet marru kontra r-riżoluzzjoni parlamentari li kienet ippermettiet lill-unjin tittrasferixxi partijiet mill-proprjetà tal-gvern lil terzi persuni.
Għalkemm ARMS Ltd kienet entità tal-gvern, il-parametri tal-konċessjoni enfitewtika tal-1957, kif emendata sussegwentement fl-1997, ma setgħux jiġu estiżi lil hinn mit-tifsira letterali tat-termini tal-konċessjoni.
U għalkemm l-oppożizzjoni ma talbitx espressament lill-qorti biex tannulla l-kirjiet, ma kien hemm xejn li jżomm lura lill-qorti milli tagħmel dan. B’hekk il-Qorti ddikjarat li l-GWU kisret il-konċessjoni li biha akkwistat il-proprjetà mingħand il-gvern kif ukoll ir-riżoluzzjoni parlamentari, u b’hekk iddikjarat nulli ż-żewġ kirjiet lill-ARMS u lil Sciacca Grill.
Madankollu, il-Qorti ċaħdet it-talba tal-Oppożizzjoni biex tannulla l-konċessjoni enfitewtika oriġinali favur il-union u ddikjarat li t-talba marret lil hinn mill-parametri tal-liġi relattiva li taħtha sar it-trasferiment. Sadanittant, il-GWU qalet li rnexxielha b’suċċess twaqqaf attentat tal-PN biex tkeċċi lit-trade union mill-kwartieri storiċi tagħha fil-Belt Valletta, xi ħaġa li żviluppat matul l-aħħar deċennji fuq konċessjoni ta’ art pubblika li ngħatat lilha mill-Istat fl-1957.
“Il-Qorti qalet li kull talba li tinvoka żgumbrament kienet “superfluwa” peress li din hija azzjoni speċjali u eċċezzjonali li ma setgħetx tiġi kkontemplata taħt l-azzjoni mressqa mill-Partit Nazzjonalista.” Il-GWU qalet li din hija t-tieni rebħa tal-Qorti minn meta Qorti Kostituzzjonali f’Diċembru 2018 sabet li d-dritt tal-union għal smigħ xieraq kien miksur meta l-Imħallef Jacqueline Padovani Grima rrifjutat li tirrikuża ruħha mill-każ, minħabba li kienet familjari mal-avukati tal-attur mid-ditta legali Fenech & Fenech.
L-Avukat Edward Debono assista lill-PN.
L-Avukati Aaron Mifsud Bonnici, John Bonello, Chris Vella u Marycien Vassallo dehru għall-GWU.
