OLYMPIACOS …………… 1
FIORENTINA ……………. 0
B’goal ta’ El Kaabi fil-116-il minuta Olympiacos għelbu lil Fiorentina 1-0 fil-finali tal-Conference League biex sar l-ewwel tim Griek li jirbaħ kompetizzjoni Ewropea.
Għal Fiorentina diżappunt kbir hekk kif tilfu għat-tieni sena konsekuttiva l-finali tal-Conference League wara li tilfu l-final tas-sena l-oħra kontra West Ham.
Kienet finali ferm bilanċjata u kumbattuta, iżda kienet ukoll finali fqira minn dawk li huma azzjonijiet perikolużi.
Olympiacos bdew aħjar u wara erba’ minuti Terracciano salva b’diffikultà xutt fil-baxx ta’ Podence. Fiorentina wieġbu b’xutt ta’ Belotti jmur barra u ftit minuti wara goal ta’ Milenkovic kien imħassar minħabba offside tal-istess plejer.
Fl-20 minuta ċans tad-deheb f’saqajn Bonaventura iżda x-xutt tiegħu kien fjakk minn qagħda ideali.
Minuta wara, l-istess Bonaventura kien imwaqqaf minn ħarġa kuraġġuża ta’ Tzolakis.
Fit-38 minuta azzjoni oħra ta’ Fiorentina iżda Gonzalez jolqot ħażin minn qagħda tajba. Minuta wara ħarġa kuraġġuża ta’ Terracciano li antiċipa lil El Kaabi.
It-tieni taqsima kompliet tkun bilanċjata u missielta iżda azzjonijiet perikolużi kienu rari.
Fil-65 minuta Milenkovic għola tajjeb fuq kulħadd iżda d-daqqa ta’ ras tiegħu kellha mira żbaljata.
Erba’ minuti wara azzjoni ta’ kontrattakk ta’ Fiorentina u save brillanti ta’ Tsolakis fuq xutt ta’ Kouame.
L-iskor baqa’ ma nfetaħx u l-logħba marret għall-ħin barrani. Ħin barrani li beda b’save mill-aqwa tal-goalkeeper ta’ Fiorentina fuq xutt ta’ Jovetic.
Erba’ minuti mill-għoti tal-penalties, Olympiacos skorjaw il-goal tar-rebħa meta El Kaabi b’xi mod dawwar il-ballun għal ġewwa mill-viċin.
(Ritratt: EPA)
