Raġel li twaqqaf waqt li kien qed isuq għax ma kienx liebes iċ-ċinturin tas-sigurtà, instab li kien qed jgħix Malta illegalment, semgħet il-Qorti l-Ħamis. Tarek Hossen, li hu mis-Sirja iżda li bħalissa jgħix il-Ħamrun, twaqqaf minn uffiċjali tal-LESA kmieni l-Erbgħa filgħodu, fi Triq Fleur De Lys, f’Birkirkara, wara li osservawh isuq mingħajr ċinturin tas-sigurtà u waqt li kien qed juża l-mowbajl, l-Ispettur tal-Pulizija Clayton Camilleri qal fil-Qorti.
Hekk kif l-uffiċjali sabu li Hossen, ta’ 27 sena, kien qed isuq mingħajr liċenzja tas-sewqan jew kopertura tal-assigurazzjoni, innutaw ukoll li d-dokument tal-identità Griega tiegħu kien skada, u wassalhom biex jinvolvu lill-Pulizija.
Il-Pulizija ħasbet li Hossen kien qabeż iż-żmien tiegħu f’Malta u effettivament kien fil-pajjiż illegalment. Huwa ġie mixli li saq mingħajr liċenzja jew kopertura tal-assigurazzjoni, li saq vettura mingħajr liċenzja, li naqas li jilbes iċ-ċinturin tas-sigurtà waqt is-sewqan, u li uża l-mowbajl waqt is-sewqan.
Waqt li deher quddiem il-Maġistrat Gianella Caruana Busuttil, Hossen ammetta l-akkużi kollha u kkonferma d-deċiżjoni tiegħu wara li ngħata l-ħin biex jikkunsidra d-dikjarazzjoni tiegħu. Il-prosekuzzjoni qalet li fid-dawl tal-koperazzjoni sħiħa u l-ammissjoni bikrija ta’ Hossen, kienet qed tirrakkomanda sentenza leggera, b’Camilleri jgħid li huwa konxju li l-akkużat ma kellux il-mezzi biex iħallas multi konsiderevoli.
Barra minn hekk, l-Ispettur Camilleri qal li l-każ issa qed jiġi eżaminat mill-Pulizija tal-Immigrazzjoni, bil-ħsieb li Hossen jiġi deportat lura lejn il-Greċja. L-avukat difensur Noel Bianco spjega lill-Qorti li Hossen għandu kundizzjoni medika li ma tħallihx itir u għalhekk kien baqa’ Malta u ma rritornax il-Greċja biex iġedded id-dokumenti tiegħu.
Din il-kundizzjoni kienet ukoll ipprojbitlu milli jaħdem, huwa qal. Wara li rrevediet is-sottomissjonijiet, il-Maġistrat Caruana Busttil sabet lil Hossen ħati fuq l-ammissjoni tiegħu stess u kkundannatu erba’ xhur ħabs, sospiżi għal sentejn kif ukoll multa ta’ €260. Hija pprojbitu wkoll milli jsuq għal 13-il xahar.
