B. DORTMUND ……….0
REAL MADRID ……….. 2
Real Madrid kif kien mistenni rebħu l-finali f’Wembley Stadium kontra Borussia Dortmund biex rebħu għall-15-il darba l-UEFA Champions League.
Kienet finali b’żewġ uċuħ fejn Borussia Dortmund iddominaw l-ewwel taqsima u fallew xi ċansijiet li bihom setgħu marru fil-vantaġġ.
Fit-tieni taqsima Real Madrid ħarġu aħjar u iktar ma beda għaddej il-ħin iktar bdew jieħdu kontroll tal-logħba u wara li marru minn fuq iddominaw u rebħu faċilment wara li skorjaw it-tieni goal.
Għal Borussia Dortmund jibqa’ biss id-diżappunt kbir u prestazzjoni qalbiena, iżda kontra tim bħal Real Madrid ma tistax tfalli ċ-ċansijiet li tkun ħloqt, u ta dan kienu kastigati biex għat-tieni darba fi spazju ta’ 11-il sena Borussia kellhom joħorġu minn Wembley Stadium b’idejhom vojta.
Wara appena minuta logħob il-logħba kellha titwaqqaf hekk kif hemm invażjoni minn naħa ta’ partitarju li rnexxielhu wkoll jieħu stessu mal-istilla ta’ Real Madrid Vinicius Junior
Sa mill-ewwel battuti deher li Borussia Dortmund mhux se jagħmlu l-ħajja ta’Real waħda faċli.
Real kellhom żewġ tentattivi mid-distanza ta’ Valverde u Vinicius, żewġ tentattivi li kienu l-uniċi li Real irnexxielhom jikkrejaw fl-ewwel taqsima.
Deher evidenti in-nuqqas ta’ kompatezza fid-difiża ta’ Real, difiża li bdiet sikwit tinqabad kull meta Dortmund kellhom azzjoni veloċi u diretti.
Fil-21 minuta Adeyemi għeleb in-nasba tal-offside ġie waħdu quddiem Courtois, irnexxielhu jaqbeż lill-goalkeeper Belġjan iżda ġġenneb wisq u Carvajal laħaq tajjeb l-angolu.
Kien l-ewwel sinjal tar-riskji li bdew jgħaddu minnhom Real u żewġ minuti wara azzjoni oħra fejn din id-darba kien Fullkrug li żgiċċa lid-difiża bix-xutt tiegħu jaħbat ma’ sieq il-lasta, anki jekk mir-ripetizzjonijiet jista’ jkun li l-pożizzjoni tiegħu kienet waħda irregolari.
Fit-28 minuta azzjoni oħra veloċi ta’ Dortmund u xutt fil-baxx ta’ Adeyemi salvat bi bravura minn Courtois.
L-aħħar intervent ta’ Courtois fil-41 minuta fuq xutt b’saħħtu mid-distanza ta’ Sabitzer.
It-tieni taqsima bdiet bi freekick mill-isbaħ ta’ Kroos li kien salvat bi bravura minn Kobel u mill-azzjoni ta’ korner Carvajal xeħet ftit għoli bir-ras.
Fit-62 minuta risposta ta’ Dortmund bid-daqqa ta’ ras ta’ Fullkrug salvata minn Courtois.
Fl-74 minuta Real Madrid fil-vantaġġ meta minn korner ta’ Kross kien Dani Carvajal li b’daqqa ta’ ras preċiża sab ix-xibka.
Tliet minuti wara Bellingham kellu ċans jagħlaq il-logħba iżda x-xutt tiegħu mar ftit barra.
Real Madrid issa kienu trasfromati hekk kif Dortmund dehru demoralizzati. Fit-80 minuta Kobel mill-ġdid fl-azzjoni biex isalva freekick ta’ Toni Kroos. Fil-81 minuta xutt ta’ Camavinga u risposta oħra brillanti ta’ Kobel. Mill-korner Nacho bir-ras impenja lil Kobel li reġa’ dawwar għal korner.
It-tieni goal kien fil-qrib u fit-83 minuta l-final kienet mitmuma hekk kif Bellingham ħataf ballun lid-difiża avversarja u qassam lejn Vinicius Junior li quddiem Kobel ma falliex.
