Kollox kważi lest biex nhar il-Ħamis li ġej, 6 ta’ Ġunju sal-Ħadd, 9 ta’ Ġunju fil-picnic area f’Ta’ Qali, tittella’ s-17 l-edizzjoni ta’ Earth Garden, meqjus bħala wieħed mill-akbar festival alternattiv fl-Ewropa bis-sehem ta’ artisti lokali u bosta esponenti internazzjonali fi stili World Music, Techno, House, Dub, Drum & Bass, Funk, Ska, Hip-Hop u Psychedelic Trance. L-attrazzjoni prinċipali għal din is-sena se jkun il-band rock psikadelika mir-Renju Unit, Kula Shaker.
Earth Garden 2024 se jkun fih ħames stages uniċi u diversi li joffri divertiment għal kull tip ta’ min iħobb ġeneri ta’ mużika differenti f’xenarju ta’ diversità u l-inklussività. Bla dubju, l-attrazzjoni tkun iffukata l-aktar fuq ir-Roots Stage, għalkemm l-Enchanted Forest se jilqa’ diversi artisti interessanti. L-Electronic Sphere, Strawberry Fields, u l-Music Playground ukoll se joffru andament mużikali tajjeb bi stili varji.
Ħa jkun hemm madwar 140 artist, fosthom Chris Goa; Nosnow/Noalps; id-duo Britanniku Groove Armada (DJ Set); Terra Live li ġejjin mill-Portugal; Infected Mushrooms – id-duo mill-Iżrael ibbażati f’Los Angeles; Son Gaia; Indubstry; Kill the Action; id-duo Awstraljan Opal Ocean; Kin’Gongolo Kiniata minn Kinshasa fil-Congo – band mill-aktar interessanti li ddoqq Afro-pop b’taħlita ta’ enerġija punk f’ħoss elettroniku b’ritmu li jara l-identita tagħhom; Tribali li se jniedu l-album il-ġdid ‘Alka’; Dub FX; Vixen Sound; DJ Nobu; Memphis Mac; id-DJ Taljan Donato Dozzy; it-techno ta’ Lewis Fautzi mill-Portugal; Talismann;, Philippa Pacho mill-Isvezja, Lemonella mill-Afrika t’isfel iżda bbażata f’Berlin; Jonjo Jury ibbażat f’Londra, DJ Ruby, Owen Jay; Marija Bellia; Cher Camilleri; ManaTapu; l-electro-folk band mill-Ukrajna Go_A; Gentleman’s Dub Club; Cushion; Hollie Cook; Xtruppaw; u Kula Shaker.
Il-band rock psikadelika mill-Ingilterra, Kula Shaker, se ddoqq il-Ħadd, 9 ta’ Ġunju fuq ir-Roots Stage għal ħin tal-10pm. Kula Shaker kien sploda fl-1996 bl-album ‘K’. Bejn l-1996 u l-1999 kellhom diversi singles fl-aqwa 10 tal-klassifika Ingliża, fosthom ‘Tattva’, ‘Hey Dude’, ‘Govinda’, ‘Hush’, u ‘Sound of Drums’.
Xi ħaġa ġdida f’din l-edizzjoni se jkun is-’secret stage’ li dawk li se jattendu għall-festival se jmorru għalih minn mina twila madwar 40 metru.
Apparti l-aspett mużikali, l-edizzjoni 2024 ser tara zona tal-camping. Hemm ukoll zona ddedikata għall-familji bit-tfal bl-isem ta’ Earth Kidz, kif ukoll parti li fiha l-familji jistgħu jagħmlu camping. L-attrazzjonijiet għat-tfal jinkludu wkoll inizjattivi minn Heritage Malta marbutin mal-arti kulinarja u l-kultura, avventura maġika, circus juggling, talent shows pubbliċi, silent discos u attivitajiet marbutin max-xjenza minn Esplora.
Il-biljetti jinkisbu minn fuq https://www.earthgarden.com.mt/tickets/.
