Raġel li għandu l-vizzju tad-droga li ffranka sentenza ta’ ħabs inqas minn ġimagħtejn ilu, ammetta li ta fastidju lill-ġenituri tiegħu u qraba oħra tal-familja għal flus, u ġie miċħud mill-ħelsien mill-arrest wara li allegatament reġa’ lura għal drawwiet ħżiena bi ksur tal-ordnijiet talQorti.
Ir-raġel ta’ 36 sena residenti Ħal Qormi, ġie skortat lura l-Qorti 12-il jum biss wara li tressaq il-Qorti fejn kien irreġistra ammissjoni u tpoġġa taħt ordni ta’ probation flimkien ma’ ordni ta’ trażżin biex iwaqqaf milli jkompli jagħti fastidju lill-familja tiegħu li kienet qed tbati.
Iżda ġimgħa wara, il-ġenituri tar-raġel irritornaw lejn it-Taqsima tal-Vjolenza Domestika u rrappurtaw li binhom kien qiegħed kontinwament jgħajjarhom biex jagħtuh il-flus biex isaħħaħ il-vizzju akut tad-droga tiegħu.
Meta rrifjutaw li jgħaddu l-flus, huwa allegatament sar aggressiv u qajjem kommossjoni. Fl-1 ta’ Ġunju, ommu u n-nanna tal-akkużat ressqu rapport addizzjonali. Waqt episodju ieħor fid-dar ta’ ommu, ħu l-akkużat daħal biex jikkonfrontah meta nsista biex jieħu l-flus.
Ommu ppruvat tikkalma s-sitwazzjoni billi wegħdulu flus iżda meta ma tagħtux, u hawn l-akkużat mar id-dar tan-nanna tiegħu biex jitlobha l-flus. Hekk kompliet l-istorja, spjega l-ispettur tal-prosekuzzjoni Omar Zammit.
L-imputat, li qal lill-Qorti li hu bla xogħol, wieġeb mhux ħati li kkaġuna lill-allegati vittmi tiegħu biża’ ta’ vjolenza, insulentahom u heddidhom kif ukoll li kiser l-ordni ta’ trażżin imposta mill-Maġistrat Victor George Axiaq fit-23 ta’ Mejju.
L-avukat tal-parte civile Frank Anthony Tabone, spjega li l-akkużat kien temm kors ta’ riabilitazzjoni mid-droga minkejja li l-qraba tiegħu għamlu dak kollu li setgħu biex jgħinuh jiġġieled il-vizzju qawwi tiegħu. L-avukat tal-għajnuna legali tar-raġel, Martin Farrugia, talab il-ħelsien mill-arrest, u sostna li l-akkużat fehem li għandu bżonn l-għajnuna u kien lest li jfittex il-kura b’mod volontarju.
Kellu wkoll indirizz fiss. Is-sieħba tal-akkużat xehdet fil-qosor li kienet lesta tilqgħu u tgħinu jieħu l-kura kollha li kellu bżonn. Iżda meta mistoqsija mill-prosekuzzjoni jekk ċempletx lill-qraba tiegħu għall-flus meta ffastidjata mill-akkużat, il-mara ammettiet li għamlet dan.
Wara li semgħet is-sottomissjonijiet, il-Maġistrat Gabriella Vella ċaħdet it-talba għall-ħelsien mill-arrest fid-dawl tan-natura tal-akkużi u l-fatt li l-allegati vittmi li għad iridu jixhdu kienu l-qraba qrib tal-akkużat. Il-Qorti rrakkomandat li d-Direttur tal-Ħabs kellu jagħti lill-akkużat l-għajnuna kollha meħtieġa biex jindirizza l-vizzju tiegħu.
Il-Qorti laqgħet ukoll talba konġunta mill-partijiet għal projbizzjoni fuq l-ismijiet kollha biex jipproteġu l-familja tal-akkużat li kienet tinkludi tfal żgħar u anzjan. Fil-ħin li t-talba tiegħu għall-ħelsien mill-arrest ġiet miċħuda, l-akkużat dar lejn missieru, bilqiegħda fuq in-naħa ta’ wara tal-awla, u minn taħt l-ilsien qallu – “dan kollu tort tiegħek.”
Kumment żejjed li ma għaddiex inosservat mill-Qorti. “Trid tiffaċċja xi akkużi oħra? Oqgħod kwiet u ieqaf. Ħalli l-avukat jagħmel xogħlu,” wissietu l-Maġistrat Vella. Dan sikket lill-akkużat.
L-Ispettur Omar Zammit mexxa l-prosekuzzjoni. L-Avukat Martin Farrugia kien avukat tal-għajnuna legali. L-avukati Arthur Azzopardi u Frank Anthony Tabone qed jassistu lill-familja.
