B’rekord ta’ ħdax-il suċċess fiċ-Champions League, bl-aħħar tlieta konsekuttivi, għal Pro Recco ma jeżistix limitu. Bejn illum u l-Ġimgħa għall-ewwel darba f’pajjiżna se tintlagħab il-fażi finali tal-aktar kompetizzjoni tal-klabbs importanti fil-waterpolo Ewropew.
Pro Recco, Olympiacos, Ferencvaros u Novi Beograd se jissieltu biex xi ħadd minnhom isir Champion Ewropew. Pro Recco hu l-aktar klabb li rebaħ il-kompetizzjoni, Olympiacos u Ferencvaros huma l-aħħar timijiet li rebħu t-trofew qabel id-dominju ta’ Recco, filwaqt li Novi Beograd għadhom qed ifittxu l-ewwel suċċess tagħhom iżda kienu finalisti fl-aħħar żewġ edizzjonijiet. Insomma, ingredjenti għal festa ta’ waterpolo.
L-erba’ timijiet kollha rebħu l-kampjonati domestiċi u mingħajr telfa. Minkejja d-dominju tagħhom, Pro Recco tilfu l-finali tal-Coppa Italia kontra Brescia bl-għoti tal-penalties iżda hu l-uniku tim bla telfa fil-ħin regolamentari f’dan l-istaġun. Fortuna differenti għal Olympiacos li għelbu lil Vouliagmeni bl-għoti tal-penalties.
It-telfiet li sofrew kienu fiċ-Champions League. Ferencvaros ġew megħluba minn Olympiacos filwaqt li Novi Beograd tilfu kontra Sabadell u darbtejn kontra Pro Recco. Olympiacos ukoll tilfu darbtejn kontra l-avversarji tal-lum.
Il-Griegi għandhom sfida kontra l-aktar tim favorit iżda għandhom iħarsu b’ottimiżmu hekk kif huma kienu l-aħħar tim li għelbu lil Pro Recco, proprju fil-finali tal-2018 u fis-semifinali tal-2019. Fiż-żewġ konfronti ta’ bejniethom fil-Fażi Preliminari, Recco ħarġu rebbieħa iżda b’gowl biss distakk fiż-żewġ okkażjonijiet.
Id-dwell l-ieħor bejn Ferencvaros u Novi Beograd għandu jkun speċjali wkoll bejn tim mill-Ungerija u ieħor mis-Serbja. Jispikkaw fost l-oħrajn hemm iż-żewġ captains jew aħjar il-veterana tat-tim. Denes Varga għal Ferencvaros u Filip Filipovic għal Novi Beograd, żewġ plejers b’karriera fenomenali li fl-età ta’ 37 sena mistennija jilagħbu l-aħħar logħob tal-karriera.
Dawk interessati li jattendu għal dawn l-erba’ logħbiet fil-Pixxina Nazzjonali f’Tal-Qroqq, jistgħu jixtru l-biljett tagħhom minn fuq is-sit www.asaofmalta.eu għal €75 li jkopri l-logħbiet kollha.
Semifinali għal-lum: Pro Recco v Olympiacos – 7.00pm, Ferencvaros v Novi Beograd – 9.00pm
Il-Ġimgħa: 3/4 post – 7.00pm, Finali – 9.00pm
