Is-Sibt f’jum il-votazzjoni u anka l-għada l-Ħadd waqt l-għadd tal-voti, Net Television u Net FM se jwasslu xandiriet specjali li ser jibdew minn kmieni filgħodu u jibqgħu għaddejijn sa tard bil-lejl.
Is-Sibt, il-programm fuq Net Televsion jibda fis-7am eżatt malli jiftħu l-postijiet tal-votazzjoni. Dakinhar se jitwasslu kollegamenti diretti minn madwar Malta u Għawdex, kif ukoll l-aħħar dettalji dwar it-turnout f’din l-elezzjoni.
Tul ix-xandira tas-Sibt, bi preżentazzjoni ta’ Dylon Brignone … ser jitwassal programm speċjali b’differenża … bis-sehem ta’ diversi personalitajiet fosthom Maxine Pace, Malcolm Pisani, Owen Luellen, Adriatwins, Louise Tedesco u Eileen Monetsin.
Dakinhar ukoll, il-crew ta’ Net News se jwassal aġġornamenti minn diversi postijiet tal-votazzjoni f’Malta, kif ukoll f’Għawdex. Bil-ġurnalisti jingħaqdu max-xandira ta’ Net Television kull siegħa b’kollegamenti LIVE minn barra l-postijiet tal-votazzjoni.
Ix-xandira tissokta fl-10pm malli jagħlqu l-postijiet tal-votazzjoni, b’analiżi mill-istudios ta’ Net TV u kollegamenti maċ-Ċentru tal-Għadd tal-Voti fin-Naxxar fejn hemmhekk insegwu l-wasla tal-kaxxi minn kull lokalità – kif spjegalna Karl Gouder, Chief Operations Officer ta’ dan l-istazzjon.
Ix-xandira se tibqa’ għaddejja tul il-lejl kollu mis-Salta tal-Għadd tal-Voti.
Imbagħad l-għada l-Ħadd, il-programm fuq Net Televsion jissokta fit-8am fejn mill-istudios ta’ Net TV u Net FM l-mistiedna flimkien mal-preżentatur Dione Borg ser ikunu qiegħdin jannalizzaw l-andament tal-għadd tal-voti .. b’kollegamenti live maċ-Ċentru tal-Għadd tal-Voti fin-Naxxar.
