Is-sidien tan-nightclub Aria, fl-Iklin, talbu l-Qorti biex twaqqaf kumpanija li torganizza avvenimenti fil-post, u allegaw li din kisret il-kuntratt tal-kiri tagħha. L-allegat ksur jikkonċerna s-subkiri tal-fond lil kumpanija terza, proprjetà tal-istess persuna – Dominic Micallef – li topera n-nightclub.
Micallef għandu n-nightclub tat-Tattingers fir-Rabat li llum m’għadux jopera, u li dan l-aħħar kien qed jipprova jiżviluppah f’lukanda. Il-kumpanija li għandha Aria qed takkuża lil Micallef li jopera minn u jospita avvenimenti fi żvilupp illegali, li l-MEPA qed titlob li jitneħħa.
F’applikazzjoni mressqa riċentament quddiem il-Bord tar-Regolazzjoni tal-Kera mis-sidien ta’ Aria, Martan Limited, kontra Dominic Micallef u Signature Entertainment Festivals Limited, fejn sostniet li DJRL Dance Ltd kienet tikri l-proprjetà f’Novembru tal-2021 u li minn dak iż-żmien, kienet wettqet ukoll numru ta’ xogħlijiet illegali hemmhekk, li kienu rriżultaw f’ordnijiet ta’ infurzar.
Martan Ltd qalet li riċentament skopriet li DJRL Dance kienet kriet ukoll il-post lil Signature Entertainment Limited. Minkejja li qabel kien obbliga ruħu li jneħħi l-istrutturi illegali, DJRL Dance kien naqas milli jagħmel dan u kien ostakola lil Martan meta kien ipprova jagħmel dan hu stess, jgħid ir-rikors, li kien iffirmat mill-avukati Franco Galea u Chantel Muscat.
B’riżultat ta’ dan, Martan qed jitolbu t-terminazzjoni tal-kirja u ressqu proċeduri separati fil-Qorti fejn talbu sentenza f’dan is-sens. Qed jitolbu wkoll li DJRL Dance jiġi żgumbrat mill-proprjetà ta’ Martan.
Micallef u grupp ieħor ta’ kumpaniji li hu marbut magħhom huma wkoll is-suġġetti ta’ każ separat ippreżentat minn Seasport Ltd, li qed titlob €1,270,000 mingħand is-SEG Concessions Limited ta’ Micallef, b’rabta mal-bejgħ tal-Mambo Beach Club, fl-Armier.
Fil-każ tas-Seasport, l-atturi jallegaw li SEG Concessions kienet qed tiddevja d-dħul mill-operat tal-Beach Club lill-kumpaniji oħt tagħha, billi ċċaqlaq fondi minn kumpanija għal oħra biex tevita li tħallas kredituri privileġġjati. Il-Qorti qed tintalab “tneħħi l-velu korporattiv” ta’ SEG Concessions Ltd, SEG MBO Ltd u SEG Holdings Ltd u twarrab il-personalitajiet ġuridiċi separati tal-kumpaniji biex tosserva li Micallef huwa l-uniku sid benefiċjarju tagħhom kollha.
