Birkirkara St. Joseph Sports Club ospita l-ewwel tiġrija tal-Kampjonati Garmin BSJ Open Water tal-2024 fis-Salina l-Erbgħa wara nofsinhar. Il-Kampjonati jikkonsistu f’ħames tlielaq fuq medda ta’ żewg kilometri u waħda fuq erba’ kilometri.
Luca Vella, rebbieħ tal-kampjonati tas-sena l-oħra, kien l-ewwel li spiċċa l-korsa ta’ 2km. Huwa kien segwit mill-qrib minn Sam Camilleri, li spiċċa erba’ sekondi biss warajh. Fit-tielet post ġie Liam Farrugia. Filwaqt li l-kundizzjonijiet tal-baħar ivarjaw minn tiġrija għal oħra, u b’effett fuq il-prestazzjoni, kemm Vella kif ukoll Camilleri rreġistraw titjib notevoli mit-tiġrija tas-sena ta’ qabel.
It-tiġrija tan-nisa laqgħet ħafna uċuħ ġodda. Ir-rebbieħa tat-tiġrija, Rossana Oddi, kisbet vantaġġ komdu fuq Kaitlyn Muscat li spiċċat fit-tieni post, u Michela Camilleri daħlet fit-tielet post. Filwaqt li t-tliet nisa għamlu d-debutt tagħhom fuq il-podju, Muscat u Camilleri kienu kkompetew fil-kampjonati tas-sena l-oħra, bit-tnejn urew titjib sinifikanti fil-ħinijiet tagħhom.
It-tieni tiġrija tal-kampjonati se ssir fis-Salina nhar l-Erbgħa, 26 ta’ Ġunju fis-6:30 ta’ filgħaxija. Ir-reġistrazzjonijiet huma miftuħa online fuq il-websajt tal-Club www.bsj.mt
Sadanittant, il-Club avża li r-reġistrazzjonijiet għall-Garmin Malta – Gozo – Malta Swimming Competition u l-Garmin Gozo – Malta Swimming Competition huma miftuħa u ħeġġeġ lil dawk li qed jippjanaw jipparteċipaw biex jirreġistraw kemm jista’ jkun malajr.
Il-Kampjonati qegħdin isiru taħt l-awspiċji tal-Aquatic Sports Association of Malta.
