Il-President ta’ Franza, Emmanuel Macron, mill-ġdid qed ikun suġġett għall-kritika qalila wara li qal li l-programmi politiċi preżentati mill-estremisti tal-lemin kapaċi jwasslu għal gwerra ċivili f’każ li jkunu implimentati fuq livell nazzjonali.
Il-kummenti ngħataw qabel il-poplu Franċiż, nhar il-Ħadd, jivvota fl-elezzjoni ġenerali fejn jintgħażlu d-deputati għall-Assemblea Nazzjonali ta’ Pariġi magħmul minn 577 membru.
It-tieni rawnd tal-votazzjoni, f’każ li jkun neċessarju, hu programmat għal nhar ilĦadd, is-7 ta’ Lulju.
Intant, is-sitwazzjoni għal Macron qed tidher aktar inċerta wara li Jordan Bardella, il-Kap tal-Partit estremista tal-lemin Rally Nazzjonali, żvela pjan aktar iddettaljat tal-proposti tiegħu għal Franza — dejjem f’każ li l-partit tiegħu jikseb rebħa storika f’din l-elezzjoni.
Min-naħa tiegħu, Bardella, waqt li kien qed jelabora dwar il-kummenti ta’ Macron, qal li ‘l-ebda President Franċiż ma għandu jirreferi għall-potenzjal ta’ xi gwerra ċivili f’pajjiżu stess’.
Hu anki enfasizza li r-Rally Nazzjonali f’każ li jingħata l-mandat biex imexxi, għandu jaħdem fuq pjan ‘li jirristawra s-sigurtà għall-poplu Franċiż kollu.’
Meta issa fadal biss ftit jiem għall-elezzjoni, ir-Rally Nazzjonali jidher li għandu l-akbar appoġġ fuq livell nazzjonali, b’36 fil-mija – u meta warajh hemm il-koalizzjoni tax-xellug bl-isem Front Popolari Ġdid, b’27 fil-mija tal-appoġġ.
Sadanittant, u skont l-aħħar sħarriġ, il-Partit Renaissance (taċ-ċentru) immexxi minn Macron għandu biss 20 fil-mija tal-appoġġ popolari.
//= $special ?>