Tkompli teskala s-sitwazzjoni ta’ ġlied intern fil-qalba tal-Labour, bil-Kap Eżekuttiv Randolph Debattista jibqa’ fil-mira tal-klikka ta’ Muscat. Bl-esponent ewlieni Neville Gafà jibqa’ jattakka lis-CEO tal-Labour, u l-manuvri li wettaq wara erba’ ħitan.
Fl-aħħar sigħat, Gafà allega li l-Kap Eżekuttiv tal-Partit Laburista ppropona li jkun hemm aktar ħabi fuq l-assi tad-deputati Parlamentari.
Neville Gafà qed jgħid li Randolph Debattista ta parir lill-Grupp Parlamentari Laburista sabiex il-Membri Parlamentari ma jagħtux rendikont dwar l-istatus tal-proprjetà tagħhom.
Iżda wara li ġiet ippubblikata din l-aħbar fuq NetNews.com.mt, is-CEO tal-PL irreaġixxa fuq il-media soċjali.
Randolph Debattista qed jgħid li din hija allegazzjoni li diġa’ ħarġet fil-passat. Fil-fatt, dawn huma stejjer simili għal dak li kien deher f’April fuq siti online.
Debattista, b’mod mill-aktar dirett, qed jiċħaq l-allegazzjonijiet ta’ Neville Gafà.
Dan huwa dak li kiteb Neville Gafà
Randolph De Battista jippontifika ruħu tal-paladin tal-politika nadifa.
Iżda meta jkun bejn erba’ ħitan, fejn mingħalih dak li se jgħid jew jissuġġerixxi mhux se jasal hemm barra, il-fehmiet tiegħu jkunu ferm differenti.
Waqt Grupp Parlamentari ta’ ftit xhur ilu, Randolph De Battista ssuġġerixxa li dwar id-Dikjarazzjoni tal-Assi, il-Membri Parlamentari m’għandhomx għaliex jagħtu rendikont dwar l-istatus tal-proprjetà tagħhom.
Bosta Membri Parlamentari li ltqajt magħhom matul dawn il-ġimagħtejn ilkoll urew l-għadab tagħhom għal dak li ppropona l-Onor. De Battista.
Onor. De Battista, x’inhi r-raġuni għaliex int tajt parir lill-Grupp Parlamentari sabiex il-Membri Parlamentari ma jagħtux rendikont dwar l-istatus tal-proprjetà tagħhom?
Prosit għalik!
Ma nagħmlux mod li qed tikri xi proprjetà u li sal-lum għadha mhix reġistrata li qed tinkera hux?
Jekk hu minnu, kemm-il proprjetà għandek li qed tikri u mhux reġistrati?
Dan huwa Randolph De Battista li wiegħed lealtà lejn il-poplu u r-Repubblika ta’ Malta u l-Kostituzzjoni tagħha.
//= $special ?>