Il-festival se jsir mit-8 sat-13 ta’ Ġunju 2024
Din il-ġimgħa timmarka l-bidu ta’ edizzjoni oħra tal-Malta Jazz Festival – festival ewlieni fil-kalendarju kulturali li ilu jsir għal diversi snin fil-belt kapitali ta’ Malta u li jinkludi diversi artisti lokali u internazzjonali mid-dinja tal-mużika jazz.
Il-Malta Jazz Festival, li ser isir bejn it-8 u t-13 ta’ Lulju 2024, joffri esperjenza mużikali li tinkludi taħlita eklettika ta’ artisti internazzjonali rinomati u talent lokali f’postijiet uniċi madwar il-Belt Valletta. Il-festival se jilħaq il-qofol tiegħu fix-xatt storiku magħruf bħala Ta’ Liesse fil-Belt Valletta, b’veduti mill-isbaħ tal-Port il-Kbir fl-isfond tiegħu.
Il-Malta Jazz Festival huwa wieħed mill-eqdem avvenimenti mużikali f’Malta li twieled fl-1991 minn Charles Gatt. Matul is-snin, dan il-festival laqa’ wħud mill-aktar esponenti importanti tal-mużika jazz, fosthom Joe Henderson, Michael Brecker, Charlie Haden, Betty Carter, Elvin Jones, Lee Konitz, Brad Mehldau, Wayne Shorter, Roy Haynes, u Paul Bley, fost oħrajn. B’differenza minn diversi festivals ewlenin tal-jazz li qed inaqsu l-kontenut tal-mużika jazz fil-line-ups tagħhom, il-Malta Jazz Festival qed jibqa jistinka biex jagħmel bil-maqlub, u biex dejjem jikseb bilanċ bejn aspetti diversi tal-mużika jazz.
Din is-sena, dan il-festival tant mistenni se jkollu line-up fenomenali li jinkludi t-trumbettist Amerikan Chief Adjuah li ġie nominat għal Grammy ħames darbiet; Walter Smith III Quartet li l-frontman tiegħu kkollabora ma’ ikoni mużikali Brażiljani bħal Chico Buarque, Guinga, Paulo César Pinheiro u Dori Caymmi; il-grupp Something Else!; u TRIO GRANDE. Il-festival se jinkludi wkoll kunċerti f’City Theatre li jinkludu l-vokalista ewlenija Brażiljana Mônica Salmaso, il-kitarrista u band Tom Ollendorff Trio, u l-pjanista bl-akkumpanjament Philippe Soirat Quartet.
Il-kunċerti ta’ nofsinhar se jerġgħu lura wkoll b’wirjiet minn mużiċisti lokali, li se jsiru fl-ispazju storiku tal-MUŻA, il-Mużew Nazzjonali tal-Arti. Din is-sena, il-festival se jinkludi wkoll kunċert għal udjenzi ta’ età iżgħar minn Julie Erikssen, li se jipprovdi introduzzjoni divertenti u interattiva għad-dinja tal-jazz fi Spazju Kreattiv, Studio B (Music Room).
Għal aktar informazzjoni dwar il-programm ta’ din is-sena żur www.festivals.mt/mjf u l-paġni tal-midja soċjali tal-festival.
