Rowen Camilleri
ĦAMRUN S…………………………0
LINCOLN RED IMPS……………1
Ħamrun S: H. Bonello, S. Borg, J. Mbong (L. Montebello 71’), R. Prsa, E. Freitas, W. Barros (T. Barbosa 80′), J. Corbalan, Mayron (B. Ederson 46’), E. Marcelina, R. Camenzuli (M. Ellul 86′), R. Lopes (V. Da Silva 86′)
L. Red Imps: N. Santana, I. Ayew (L. Casciaro 71′), B. Lopes (R. Munoz 71’), K. Gomez, T. De Barr (C. Cid 86′), E. Britto (P. Moreno 79′), Nano, Joe (G. Torilla 80′), J. Sergeant, D. Bent, V. Villacanas
Imwissija: K. Gomez 24’, T. De Barr 45+2′, I. Ayew 64’, J. Sergeant 66′, N. Santana 74′ (L), E. Marcelina 32’, S. Borg 71′ (Ħ)
Tkeċċew: E. Freitas 9’ (Ħ), K. Gomez 45’ (L)
Skorja: E. Britto 37’ (L)
Referee: Aleksandar Stavrev
Assistenti Referees: Dejan Kostadinov u Goce Petreski
Fis-Centenary Stadium, Ħamrun Spartans ħarġu fuq in-naħa t-telliefa kontra Lincoln Red Imps bl-iskor ta’ 1-0, fl-ewwel leg tal-Ewwel Round ta’ kwalifikazzjoni tal-UEFA Champions League. Il-partita kienet waħda movimentata u mimlija episodji fejn saħansitra rajna żewġ tkeċċijiet, waħda fuq kull naħa.
Wara biss disa’ minuti ċ-champions Maltin ħadu daqqa ta’ ħarta meta r-referee mill-federazzjoni tal-Maċedonja ta’ Fuq, keċċa lil Elionay Freitas b’karta ħamra diretta.
L-ewwel konklużjoni lejn il-lasti waslet mit-tim minn Ġibiltà fis-16-il minuta meta minn kross ta’ Nano kien Kike Gomez li ra d-daqqa ta’ ras tiegħu tkun salvata minn Bonello.
Lincoln Red Imps marru fil-vantaġġ fis-37 minuta meta kien Ethan Britto li rnexxielu jidħol fil-kaxxa mix-xellug u b’xutt b’saħħtu għeleb għalkollox lil Henry Bonello.
Ftit qabel il-mistrieħ, żewġ episodji f’inqas minn minuta meta l-ewwel tkeċċa l-plejer ta’ Lincoln Red Imps Kike Gomez għat-tieni karta safra biex ftit sekondi wara r-referee Aleksandar Stavrev saffar penalty għall-istess Lincoln Red Imps, iżda wara li mar jara l-VAR biddel id-deċiżjoni tiegħu, biex l-ewwel taqsima spiċċat bl-iskor ta’ 1-0 favur it-tim minn Ġibiltà.
Bidu tat-tieni taqsima u Ħamrun mill-ewwel fuq l-offensiva. Azzjoni personali tal-midfielder Roko Prsa, bil-Kroat javvanza lejn tarf il-kaxxa u jipprova jaħsad lill-goalkeeper avversarju, bil-ballun jgħaddi ċentimetri minn fuq il-mimduda.
Mas-siegħa logħob Wendel Barros ta’ Ħamrun jittanta xortih minn barra l-kaxxa iżda Santana jilqa’ tajjeb.
Ħamrun imorru viċin fis-67 minuta meta l-free kick b’saħħtu ta’ Raphael Lopes ikun imdawwar f’korner bi bravura minn Santana u t-tim immexxi minn Zinnari jieħu f’idu l-partita.
Fit-78 minuta Ħamrun għal darb’oħra perikolużi meta l-kross ta’ Corbalan sab lil Prsa li minn taħt il-lasta bir-ras tefa’ għoli.
Ċans ieħor għal Ħamrun fit-88 minuta meta Prsa sab lil Corbolan fil-kaxxa li pprova xutt mill-viċin iżda kien milqugħ minn Santana qabel mad-difiża tajret il-periklu.
L-iskor sat-tmiem baqa’ dak ta’ 1-0 favur Lincoln Red Imps biex issa l-Ħamruniżi l-ġimgħa d-dieħla jmorru jilagħbu f’Ġibiltà biex jipprovaw idawru r-riżultat favur tagħhom, bil-partita bla dubju li għadha waħda miftuħa.
