Fi tmiem il-ġimgħa li għaddiet intemm b’suċċess l-edizzjoni ta’ din is-sena tal-Malta Jazz Festival, li kien jinkludi diversi avvenimenti li ttellgħu matul l-istess ġimgħa. Dan il-festival, li huwa wieħed mill-festivals ewlenin fil-kalendarju kulturali ta’ Malta, ilu jsir fil-Belt mill-1991 u jinkludi artisti lokali u internazzjonali mill-qasam tal-mużika jazz.
L-edizzjoni ta’ din is-sena tal-Malta Jazz Festival sar bejn it-8 u t-13 ta’ Lulju 2024 u offra esperjenza mużikali eċċezzjonali b’taħlita ta’ artisti rinomati u ta’ artistrija lokali f’postijiet uniċi madwar il-Belt Valletta bil-qofol jintlaħaq f’Ta’ Liesse.
Il-Ministru għall-Wirt Nazzjonali, l-Arti u l-Gvern Lokali Owen Bonnici esprima sodisfazzjon għas-suċċess tal-festival. “Il-Malta Jazz Festival huwa mhux biss manifestazzjoni ta’ dedikazzjoni u ta’ passjoni għad-dinja tal-jazz, iżda wkoll ċelebrazzjoni tal-kultura u l-wirt mużikali. Huwa pjaċir kbir għalina li naraw tant nies, kemm lokali kif ukoll turisti, igawdu minn din l-esperjenza mużikali unika”. Huwa wiegħed li se jkompli jappoġġja avvenimenti bħal dawn li jsaħħu s-sens kulturali tagħna u jsaħħu l-pożizzjoni ta’ Malta fuq il-mappa internazzjonali tal-arti u tal-mużika,” temm jgħid il-Ministru Bonnici.
Is-serata ta’ din is-sena kienet mimlija b’line-up fenomenali li inkludiet artisti bħal Chief Adjuah, trumbettist Amerikan nominat għall-Grammy ħames darbiet; Walter Smith III Quartet, li l-frontman tiegħu kkollabora ma’ ikoni mużikali Brażiljani bħal Chico Buarque u Guinga; il-grupp Something Else!; u TRIO GRANDE. Kien hemm ukoll kunċerti fis-City Theatre li inkludew il-vokalista Brażiljana ewlenija Mônica Salmaso, il-kitarrista Tom Ollendorff Trio, u l-pjanista Philippe Soirat Quartet.
Il-festival kien jinkludi wkoll kunċerti minn mużiċisti lokali li ttellgħu fil-MUŻA, il-Mużew Nazzjonali tal-Arti. Għall-ewwel darba wkoll, il-festival kellu kunċert għal udjenzi iżgħar minn Julie Erikssen fi Spazju Kreattiv, li offra introduzzjoni divertenti u interattiva għad-dinja tal-jazz.
