Illum qed naraw kif numru ta’ bajjiet huma kontaminatti bid-drenaġġ u dan huwa riżultat ta deċiżjonijiet politiċi u mudell ekonomiku li mhux sostenibli.
Kien dan il-messaġġ li waslu d-Deputati Ryan Callus, Rebecca Borg u Mario de Marco waqt konferenza tal-aħbarijiet li saret it-Tlieta waranofsinhar, fid-Dar Ċentrali tal-Partit Nazzjonalista.
![](https://cdn.netnews.com.mt/wp-content/uploads/2024/07/16154219/Pres-Conference-Partit-Nazzjonalista-3-600x400.jpg)
Ix-Shadow Minister għall-Enerġija, ir-Riċerka u l-Innovazzjoni Ryan Callus spjega kif fl-2013 Malta kellha l-iktar baħar nadif – però, issa, numru ta’ bajjiet ingħalqu għall-pubbliku.
Fost dawn hemm il-bajja tal-Ballutta li ilha magħluqa għal madwar xahrejn, u xorta l-Water Corporation Service qed tfalli milli tieħu azzjoni.
Fid-dawl ta’ dan kollu, Ryan Callus insista li l-Gvern qed jonqos mid-dmirijiet tiegħu.
![](https://cdn.netnews.com.mt/wp-content/uploads/2024/07/16154252/Pres-Conference-Partit-Nazzjonalista-6-600x400.jpg)
Minn naħa tagħha x-Shadow Minister għall-Ambjent Rebecca Borg saħqet li il-mudell ekonomiku preżenti li qed iħaddan il-Gvern qed iwassal għal tniġġis fl-arja u anke għal noise pollution.
Spjegat kif l-ERA qalet li huwa evidenti li fl-ibħra tagħhna hemm id-drenaġġ – madanakollu l-ERA qed tibqa’ tinsisti li hemm algi, waqt li l-Gvern qed iwaħħal fil-heatwave u fl-iskart li qed jintrema.
B’kuntrast, Gvern Nazzjonalista mill-Oppożizzjoni qed joffri pjan ċar għall-ambjent.
![](https://cdn.netnews.com.mt/wp-content/uploads/2024/07/16154325/Pres-Conference-Partit-Nazzjonalista-9-600x400.jpg)
Ix-Shadow Minister għat-Turiżmu Mario de Marco sostna li ż-żieda fil-popolazzjoni ma kinitx akkumpanjata minn investiment u għalhekk waslet għal pressjoni kbira fuq l-infrastruttura.
Dan wassal għal problemi kbar fl-ibħra ta’ pajjiżna fi żmien meta pajjiżna l-iktar li jkollu turisti.
Mario de Marco tenna li issa wasalna f’salib it-toroq u għalhekk il-Gvern jeħtieġ ipoġġi madwar mejda flimkien mal-imsieħba soċjali biex jippjana viżjoni għall-10 snin li ġejjin.
![](https://cdn.netnews.com.mt/wp-content/uploads/2024/07/16154357/Pres-Conference-Partit-Nazzjonalista-7-600x400.jpg)