Sliema jirritornaw għar-rebħ, tliet punti bi tbatija għal Neptunes u Exiles jirbħu b’rimonta

It-tliet punti għal Neptunes Videoslots waslu iżda waslu bi tbatija kontra Valletta Izibet. Prestazzjoni xejn sodisfaċenti ta’ Neptunes kontra avversarji li probabbli kellhom l-aħjar prestazzjoni tal-kampjonat. Il-logħba mill-bidu dehret li setgħet tkun qrib iżda forsi ħadd ma stenna li setgħet tibqa’ inċerta sal-aħħar.

Neptunes dejjem kienu pass qabel l-avversarji fl-ewwel parti tal-logħba u meritatament kienu fil-vantaġġ. Madankollu Valletta ħasdu lill-avversarji fit-tielet sessjoni u skorjaw erba’ gowls konsekuttivi biex marru 7-5 fil-vantaġġ għall-ewwel darba. Neptunes stejqru u b’gowl fl-aħħar sekonda tas-sessjoni ħadu vantaġġ minimu għall-aħħar sessjoni. Il-logħba baqgħet qrib u kien biss ftit aktar minn minuta mit-tmiem li Stevie Camilleri għalaq il-logħba.

Sliema Frank Salt irritornaw għar-rebħ fid-debutt tat-Taljan Giacomo Cannella. Prestazzjoni pożittiva iżda ma kinitx faċli kontra Sirens Build Fitness u kien biss fl-aħħar sessjoni li ħadu l-kontroll totali tal-logħba. Giacomo Cannella u Andreas Galea taw vantaġġ doppju lil Sliema fl-ewwel sessjoni, b’Sliema jispiċċaw it-tieni sessjoni b’vantaġġ ta’ 4-1.

Sirens pruvaw jersqu qrib l-avversarji fit-tielet sessjoni iżda fit-tliet okkażjonijiet li skorjaw, Sliema kienu attenti li skorjaw kull darba u żammew distakk tajjeb. Jake Cachia naqqas id-distakk għal 7-5 fil-bidu tal-aħħar sessjoni iżda kien hawn li Sliema żiedu u aċċertaw mir-rebħa b’erba’ gowls konsekuttivi biex ikkontrollaw l-aħħar minuti.

Exiles Welbee’s telgħu waħedhom fit-tieni post wara li dawru l-logħba favur tagħhom kontra Otters Nivea. It-tim Għawdxi kellu l-kontroll sa nofs il-logħba u kien jimmeritah il-vantaġġ ta’ 5-2 li kellu fl-ewwel sessjoni, b’Otters iżommu l-vantaġġ tripplu fit-tieni sessjoni. Bl-andament tal-logħba, kienet mistennija reazzjoni minn Exiles, liema reazzjoni waslet fit-tielet sessjoni.

Exiles dawru l-logħba u bi tripletta ta’ Kurt Griscti u doppjetta ta’ Drasko Gogov marru 9-7 fil-vantaġġ. F’din is-sessjoni, Otters tilfu lil Mark Meli u David Dimech. Fl-aħħar sessjoni, Otters dehru mingħajr saħħa biex jevitaw it-telfa u setgħu biss inaqqsu d-distakk wara l-gowls tal-avversarji.

NEPTUNES VIDEOSLOTS….. 11

VALLETTA IZIBET………………. 9

(3-2), (2-1), (3-4), (3-2)

Neptunes: A. Borg Cole, D. Kholod (1), S. Gialanze (2), G. Pace (1), J. Camilleri, L. Mallia, S. Camilleri (3), M. Castillo (1), J. Muscat (2), J. Bajada (1), A. Fenech, E. Mallia, M. Rossi, D. Bugeja

Valletta: B. Busuttil, M. Mifsud (1), J. Sciberras (1), S. Busuttil, K. Borg (1), M. Zammit, I. Nagaev (6), S. Micallef, A. Agius, M. Chircop, K. Cremona, A. Bugeja, C. Mercieca

Referees: Ronnie Spiteri, Antonio Torneo

SLIEMA FRANK SALT………. 12

SIRENS BUILD FITNESS…… 6

(2-0), (2-1), (3-3), (5-2)

Sliema: N. Grixti, E. Schembri (1), L. Galea, J. Gambin, G. Cannella (4), B. Cachia, J. Cutajar (1), D. Rizzo, J. Brownrigg, A. Galea (2), Z. Mizzi, D. Zammit (3), M. Castillo, J. Cassar (1)

Sirens: M. Bonello DuPuis, P. Serracino, K. Erdogan (1), P. Borg (1), J. Cachia (1), K. Agius, D. Merkulov (2), I. Riolo, J. Zerafa Gregory, G. Farrugia (1), M. Sciberras, M. Azzopardi, J. Parnis, M. Ortoleva

Referees: Massimo Angileri, Andrea Doro

L-EWWEL DIVIŻJONI

OTTERS NIVEA………………. 9

EXILES WELBEE’S………….. 11

(5-3), (2-1), (0-5), (2-2)

Otters: M. Xerri, M. Bonnici, K. Scicluna, K. Micallef, M. Meli (1), D. Dimech, I. Azzopardi (2), S. Dimech, L. Dimech (1), P. Smiljevic (4), M. Farrugia, A. Dimech (1), M. Grech, T.J. Mifsud

Exiles: Z. Dzanovic, Z. Cutajar Licari (1), Z. Micallef, D. Pace Lupi, M. Martellacci, N. Bonavia (1), D. Gogov (5), K. Griscti (3), N. Paris (1), K. Tanti, M. Fenech, N. Saliba, G. Galea Curmi, S. Cutajar Casha

Referees: Peter Balzan, Andrea Doro

Kampjonat Premier

L-Ewwel Diviżjoni

Logħob li jmiss

It-Tlieta: Exiles v Barracudas 6.00pm, Otters v Marsaskala 7.15pm, Sirens v Birżebbuġa 8.30pm

L-Erbgħa: Marsaxlokk v Ta’ Xbiex 6.00pm, Sliema v Neptunes 7.15pm, San Ġiljan v Valletta 8.30pm