Il-kummissjoni tas-sajd ħabbret limitu li jirrestrinġi l-ammont u d-daqs tal-ħut li jista’ jinqabad, u li ġie impost fuq is-sajd rikreattiv tal-lampuki.
Is-sajjieda se jitħallew jaqbdu biss limitu ta’ 10kg jew ħames lampuki ta’ kull daqs.
Is-sajjieda għandhom ukoll jaqbdu biss lampuki li jkunu tul ta’ 35 ċm jew aktar, u huwa pprojbit li jaqbdu, iżommu jew jaħżnu xi ħut iżgħar minn hekk.
L-istaġun tas-sajd tal-Lampuki se jibda f’Santa Marija, fil-15 ta’ Awwissu, u jibqa’ għaddej sal-aħħar ta’ Diċembru.
Mill-2021, is-sajjieda tħallew jistadu fl-istaġun tal-lampuki bil-kundizzjoni li l-qabda tagħhom tibqa’ għall-konsum personali u ma tinbigħx.
Ir-regolamenti ma jolqtux lis-sajjieda kummerċjali.
L-applikazzjonijiet għas-sajd rikreattiv jagħlqu nhar it-Tnejn 5 ta’ Awwissu. L-awtorizzazzjoni rikreattiva tal-lampuki se tinħareġ mill-1 ta’ Awwissu u tintbagħat permezz ta’ email.
