Sirens Build Fitness telgħu momentarjament fit-tielet post qabel il-konfront bejn Neptunes u Sliema b’rebħa importanti kontra Birżebbuġa Freeport. Kien konfront ta’ żewġ faċċati, b’konfront bilanċjat fl-ewwel parti u dominanza minn Sirens fit-tieni parti.
Fl-ewwel sessjoni spikka Jake Cachia li bi tripletta poġġa lil Sirens 3-2 minn fuq. Il-vantaġġ ta’ Sirens kiber għal 5-3 sakemm 47 sekonda minn tmiem it-tieni sessjoni, seħħ l-episodju li ħalla impatt fuq il-logħba. Il-plejer ta’ Sirens Matthias Azzopardi tkeċċa għal brutalità wara daqqa kerha fil-konfront ta’ Ben Grech.
Madankollu f’erba’ minuti ta’ superjorità numerika, għajr il-penalty mit-tkeċċija, Birżebbuġa ma skorjawx u saħansitra kienu Sirens li sabu x-xibka u kabbru l-vantaġġ għal 7-4 fit-tielet sessjoni. Grech naqqas id-distakk iżda Sirens wieġbu b’żewġ gowls oħra, biex għalqu l-logħba u kabbru l-marġni tar-rebħa fl-aħħar sessjoni.
Marsaskala Optima tħabtu iżda rkupraw minn bidu kajman biex għelbu lil Otters Nivea 11-8 u telgħu waħedhom fit-tielet post. Għalkemm ħarġu telliefa, wieħed jirrimarka t-titjib ta’ Otters li qed ikunu ta’ sfida għal kull tim.
Petar Smiljevic poġġa lil Otters 4-2 minn fuq fl-ewwel sessjoni iżda Marsaskala dawru r-riżultat bi tliet gowls konsekuttivi fit-tieni sessjoni. Mark Meli ġab id-draw iżda Marsaskala ħadu vantaġġ doppju, liema vantaġġ ġie kkonsolidat għal 9-5 fl-aħħar sessjoni. Otters ittantaw jidħlu fil-logħba u naqqsu d-distak għal żewġ gowls iżda Marsaskala kkontrollaw l-aħħar mumenti.
Exiles Welbee’s komplew isaħħu t-tieni post b’rebħa faċli fuq Barracudas. Huma bnew vantaġġ ta’ 4-1 fl-ewwel sessjoni liema vantaġġ kiber għal 9-1 fit-tieni sessjoni sakemm Mario Guidi naqqas id-distakk, b’Exiles kienu diġà kienu aċċertaw mir-rebħa sa nofs il-logħba.
Protagonist għal Exiles fit-tielet sessjoni kien Drasko Gogov li skorja erba’ gowls. Konsolazzjoni għal Barracudas kien li fit-tieni parti tal-logħba żammew ftit iktar ir-ritmu mal-avversarji għalkemm tliet gowls lejn it-tmiem, kabbru d-distakk tar-rebħa ta’ Exiles.
SIRENS BUILD FITNESS…….13
BIRŻEBBUĠA FREEPORT….. 5
(3-2), (3-2), (3-1), (4-0)
Sirens: M. Bonello duPuis, P. Serracino, K. Erdogan, P. Borg (2), J. Cachia (3), K. Agius, D. Merkulov (3), I. Riolo (1), J. Zerafa Gregory (1), G. Farrugia (2), M. Sciberras, M. Azzopardi, J. Parnis, M. Ortoleva (1)
Birżebbuġa: M. Sladden, M. Aquilina, N. Cassar, B. Grech (2), S. Bezzina, M. Manara, A. Barroso (2), M. Cassar, D. Farrugia, M. Cutajar, M. Mannino (1), M. Curmi, S. Livori, D. Incorvaja
Referees: Stefan Licari, Matteo Giacchini
L-EWWEL DIVIŻJONI
EXILES WELBEE’S…….. 20
BARRACUDAS………….. 8
(4-1), (5-1), (7-4), (4-2)
Exiles: Z. Dzanovic, Z. Cutajar Licari, Z. Micallef (1), D. Pace Lupi (1), M. Martellacci, N. Bonavia, D. Gogov (7), K. Griscti (3), N. Paris (3), K. Tanti, M. Fenech (3), N. Saliba (1), S. Cutajar Casha, M. Paris Roding (1)
Barracudas: C. Bugeja, G. Massa (1), N. Farrugia (2), P. Micallef, W. Ruggier, R. Sciortino (1), N. Rizzo, J. Schembri Young, S. Apap, M. Guidi (3), L. Pursehouse (1), C.J. Saliba, A. Micallef, T. Camilleri
Referees: Richard Magri, Matteo Giacchini
OTTERS NIVEA……………….. 8
MARSASKALA OPTIMA… 11
(4-2), (0-3), (1-2), (3-4)
Otters: M. Xerri, M. Bonnici, K. Scicluna, K. Micallef, M. Meli (1), D. Dimech, I. Azzopardi, S. Dimech, L. Dimech (1), P. Smiljevic (6), M. Farrugia, A. Dimech, M. Grech, T.J. Mifsud
Marsaskala: A. Muscat, D. Ciantar, E. Manzi (5), J. Pace Mizzi, M. Carani (2), R. Greco, K. Navarro, M. Farrugia, K. Grech, G. Sammut (1), J. Ciantar (2), M. Agius, M. Borg, L. Montebello Brownrigg (1)
Referees: Neville Mercieca, Michele Campora
Logħob li jmiss
Illum: Marsaxlokk v Ta’ Xbiex 6.00pm, Sliema v Neptunes 7.15pm, San Ġiljan v Valletta 8.30pm
