Anzjan ġie kkundannat sentejn ħabs wara li ammetta li daħħal f’Malta b’mod illegali għadd ta’ persuni minn pajjiżi terzi. Hu ammetta li qarraq u li għamel dikjarazzjonijiet foloz lill-awtoritajiet kompetenti. Dan wara li stqarr li għandu bżonn dawn il-ħaddiema kollha biex ikun jista’ jopera tliet restoranti, meta wieħed minnhom kien fil-proċess li jagħlaq u ieħor kien għadu ma fetaħx.
Id-difiża u l-prosekuzzjoni qablu li isem ir-raġel ma jkunx ippubblikat fil-midja minħabba li l-investigazzjonijiet dwar il-każ għadhom għaddejjin rigward cittadini terzi li qegħdin Malta b’mod illegali waqt li qegħdin jigu intraċċati u mitkellma mill-Pulizija. Il-Qorti anzi ordnat divjett mhux biss fuq l-isem, iżda wkoll fuq l-età u l-post tal-oriġini tar-raġel.
L-investigazzjonijiet saru bejn il-Pulizija u l-JobsPlus. Il-Pulizija qalet li jirriżulta li r-raġel għamel applikazzjonijiet biex iġib, u fil-fatt ġab, f’Malta għadd ta’ ħaddiema prospettivi li qabeż ferm id-domanda reali ta’ ħaddiema li kellu bżonn in-negozju tiegħu biex jopera.
Quddiem il-Maġistrat Monica Vella, ir-raġel ġie akkużat bi traffikar ta’ persuni, dikjarazzjonijiet foloz u esplojtazzjoni, fost oħrajn. L-Ispettur Karl Roberts li mexxa l-prosekuzzjoni, qal li aktar kmieni dan ix-xahar waslu rapporti minn Jobsplus u Identità li kumpanija tal-akkużat kellha fuq kotba magħha ammont ta nies li jeċċedi ħafna iktar milli tista’ tħaddem.
Il-kumpanija għandha tliet restoranti. Wieħed jinsab fil-proċess li jagħlaq u ieħor għadu lanqas biss beda jopera. Ħafna minn dawn, li huma ta’ nazzjonalità Indjana, mhux veru qed jaħdmu ma’ din il-kumpanija u lanqas għandhom permess ta’ residenza f’Malta.
L-Ispettur Roberta qal li l-Pulizija bagħtet għal numru spstanzjali ta’ dawn l-Indjani li qalulu li f’pajjżhom raw rekalmi li hemm bżonn waiters, cleaners eċċ. biex jigu Malta u jaħdmu ma’ din il-kumpanija. L-Avukat Giannella de Marco qalet li l-akkużat għandu fedina penali nadifa, ikkopera mal-Pulizija u ammetta fi stadju bikri tal-proċeduri.
L-Avukat difensur għamlet rakkomandazzjoni lill-Awtorità tal-ħabs minħabba l-pressjoni għolja u dijabete li għandu. Il-ħati m’għandux ikun espost għal sħanat kbar u jkompli jiġi segwit minħabba l-kundizzjonijiet li jbati bihom. Il-prosekuzzjoni wkoll qablet ma’ sentenza fil-minimu minħabba li l-imputat ikkopera mal-awtoritajiet.
L-avukat Bernard Żarb mill-korporazzjoni Jobsplus, kien preżenti fl-awla. Wara li qieset kollox, il-Qorti kkundannatu sentejn ħabs effettivi.
