It-Taqsima Ospitalità u Ikel fi ħdan il-General Workers’ Union irreġistrat tilwima industrijali mal-WasteServ minħabba li l-kumpanija ma pprovditx it-tagħmir approprjat lill-ħaddiema tagħha fil-Faċilità għall-Immaniġġjar tal-Iskart, fil-Magħtab.
It-Taqsima waslet biex tirreġistra din it-tilwima mad-DIER wara diversi tentattivi li għamlet mal-maniġment tal-kumpanija biex jagħtu l-uniformi tas-sajf lill-ħaddiema li huma kostretti jaħdmu f’dawn it-temperaturi għoljin bl-uniformi tax-xitwa. It-Taqsima ma ngħatat l-ebda tweġiba lura mill-maniġment tal-WasteServ.
Is-Segretarju tat-Taqsima, Kevin Abela, qal li “s-saħħa u s-sigurtà fuq il-post tax-xogħol huma ta’ prijorità għalina. Bħala parti minn dan il-proċess, il-ħaddiema li jaħdmu fuq barra għandhom jingħataw ilbies protettiv adegwat għax-xemx u s-sħana. Il-GWU ma kellhiex triq oħra ħlief li tirreġistra tilwima industrijali li tista’ twassal għal azzjonijiet industrijali.”
