“Il-PN qed jisħaq li hemm bżonn li ta’ pjan ċar ħafna u fit-tul u għalhekk li l-PN se jibqa’ jagħmel konsultazzjoni kontinwa sabiex issir il-bidla li għandu bżonn pajjiżna.”
Sostna dan il-Kap tal-Partit Nazzjonalista f’kollegament telefoniku waqt il-programm Analiżi fuq Net Television, il-Ħadd filgħodu, hekk kif spjega li l-poplu Malti u Għawdxi jixraqlu tant u tant aħjar minn dak li għaddej minnu bħalissa.
Fost oħrajn Bernard Grech semma’ s-sitwazzjoni serja tal-Gvernatur tal-Bank Ċentrali li għadu ma rreżenjax minkejja li jinsab akkużat kriminalment, fejn fid-dawl tal-aħħar żviluppi mill-Qorti, Robert Abela ċaħad it-talba ta’ Bernard Grech biex jitlaqqa’ l-Parlament b’urġenza sabiex tiġi diskussa din il-materja.
Bil-Kap tal-Partit Nazzjonalista jsostni li l-Gvern ta’ Robert Abela huwa wieħed bla pjan u li ħa deċiżjonijiet ħżiena.
Kien hawn li Bernard Grech spjega li għall-kuntrarju ta’ Gvern Laburista, il-Partit Nazzjonalista immedjatament kien dak li talab għar-reżenja ta’ Chris Fearne u Edward Scicluna.
Il-Kap tal-PN tkellem ukoll dwar il-kriżijiet li ħoloq dan il-Gvern fi kważi kull settur f’pajjiżna, fosthom fis-settur tal-enerġija.
Il-Kap tal-PN Bernard Grech spjega li Robert Abela tilef il-kontroll, u saħanistra spiċċa jigdeb dwar is-sitwazzjoni tad-drenaġġ f’pajjiżna.
Għall-kuntrarju ta’ dan kollu, Bernard Grech tenna li huwa l-Partit Nazzjonalista, gvern alternattiv li se jibqa’ jidjaloga sabiex issir bidla li tant hemm bżonn f’pajjiżna fejn fakkar fil-5 punti li ġew elenkati u li se jkunu qed isiru fl-ewwel 100 ġurnata ta’ Gvern Nazzjonalista; li ssir konferenza nazzjonali b’rabta mal-popolazzjoni f’pajjiżna; li jkunu implimentati s-soluzzjonijiet u l-proposti tal-PN biex negħlbu l-għoli tal-ħajja; li jgħaddu sett ta’ liġijiet mill-Parlament sabiex jiġu implimentati r-rakkomandazzjonijiet tal-Inkjesta Pubblika relatata mal-assassinju ta’ Daphne Caruana Galizia; li l-ambjent isir dritt fundamentali tal-bniedem; u li tingħata direzzjoni sabiex jinġiebu lura l-€400 miljun li nsterqu mid-deal frawdolenti tat-3 sptarijiet.
