Kollox jinsab lest sabiex nhar is-Sibt il-Palazz tal-Verdala jiftaħ il-bibien tiegħu għal dawk li se jattendu l-August Moon Ball ta’ din i-sena.
Ftit siegħat qabel l-avveniment, il-President ta’ Malta Myriam Spiteri Debono żaret l-aħħar preparamenti li kienu għadejin sabiex dan il-ballu ikun ta’ suċċess.
Matul iż-żjara tagħha l-President segwiet mill-qrib ix-xogħol li qed isir, u irringrazjat lill-ħaddiema kollha kif ukoll lill-membri tal-armata li kienu qed jaħdmu fil-ġnien tal-Verdala fi sħana kbira.
Myriam Spiteri Deobono qalet ukoll li din is-sena dawk kollu li jattendu se jsibu sorpriża mill-isbaħ fis-sala ewlenija tal-Palazz.
L-August Moon Ball ta’ din is-sena se jkun l-ewwel wieħed taħt il-patroċinju tal-President Myriam Spiteri Debono u r-raġel tagħha. Il-Ballu se jkun qed jibda għal ħabta tas-sebgħa ta’ filgħaxija u l-qliegħ kollu se jkun qed imur għand il-Malta Community Chest Fund li l-għan ewlieni tagħha jibqa’ li jgħinu lil dawk l-aktar vulnerabli, fosthom il-pazjenti tal-kanċer.
Barra minn hekk dawk li jattendu se jkunu jistgħu igawdu l-arkitetura tal-Palazz tal-Verdala, ir-residenza li fiha tgħix il-President fix-xhur tas-sajf.
